O BAIXO MIÑO

O BNG exixe á Xunta proxectos rigorosos e un servizo garantido mentres se renova o transporte do Baixo Miño     

● Brais Ruanova denuncia que o PP votou en contra das medidas esenciais para evitar que a cidadanía siga pagando polos incumprimentos das concesionarias    

 

Brais Ruanova, deputado do Bloque Nacionalista Galego, nun momento da súa intervención na Comisión 2ª, Ordenación Territorial, Obras Públicas, Medio Ambiente e Servizos, reunida este xoves, día 29 de xaneiro de 2026, ás 10:30 horas, no pazo do Parlamento, na cal, entre outros asuntos, foi tratada á iniciativa parlamentaria presentada polo Grupo Parlamentario do Bloque Nacionalista Galego "Sobre as medidas que debe tomar a Xunta de Galicia co obxectivo de mellorar o servizo de transporte público por estrada na comarca do Baixo Miño"

Infogauda / O Baixo Miño 

 O deputado do Bloque Nacionalista Galego, Brais Ruanova, denunciou a crise que vive o transporte público por estrada na comarca do Baixo Miño, e presentou as medidas urxentes que a Xunta de Galiza debe aplicar para reverter a situación. Estas propostas, votadas en contra polo Partido Popular no Parlamento galego, apuntan a dous eixes fundamentais que o goberno do PP non pode ignorar.  

 En primeiro lugar, o BNG exixe a elaboración de novos proxectos de explotación rigorosos e tecnicamente viables, deseñados desde as necesidades reais da cidadanía e non desde os intereses das empresas concesionarias. “O transporte público non é un luxo, é un dereito básico”, destacou Ruanova, lembrando que na zona rural e semiurbana do Baixo Miño, a falta dun servizo digno impide o acceso a educación, traballo ou sanidade.  

 En segundo lugar, e de maneira inmediata, reclámase que a empresa concesionaria actual continúe a prestar o servizo con todo o rigor e puntualidade esixidos no contrato mentres non se poñan en marcha os novos acordos. “Non podemos permitir que, baixo o pretexto da transición, a cidadanía siga pagando as consecuencias dunha mala xestión que non é súa”, sinalou o deputado nacionalista.  

 Ruanova recordou que o PP, a través do conselleiro Diego Calvo, negou durante meses a degradación do servizo, cualificándoa de “invención”, ata que a presión social e parlamentaria forzou a rescisión do contrato coa UTE Lugove. “Agora o Goberno ten unha segunda oportunidade para demostrar que lle importa o Baixo Miño e que reverterá a súa política de abandono”, apelou.  

 O deputado criticou tamén o “oportunismo” do PSOE, que “só se suma cando xa non hai saída”, e reivindicou o papel do BNG como forza “que leva anos na primeira liña da denuncia e da proposta”. A iniciativa presentada polo Bloque busca converter o transporte público nun “pilar estratéxico dunha mobilidade sostible, inclusiva e eficaz”, alén de “poñer fin a décadas de desatención e subordinación aos intereses privados”.  

 A proposta do BNG foi rexeitada polos votos en contra do PP, un feito que, segundo Ruanova, “deixa en evidencia a falta de vontade política para resolver de raíz un problema que afecta á vida diaria de miles de persoas”.