DEPORTES

FÚTBOL

1ª Autonómica Grupo 6

O SPORTING GUARDÉS RECIBIRÁ AO GONDOMAR C.F.

•  Este domingo, día 1 de febreiro, ás 16:30 horas, no Estadio municipal A Sangriña

Ricardo Rodríguez Vicente / A Guarda

 O Estadio municipal A Sangriña acollerá este domingo, día 1 de febreiro, ás 16:30 horas, un importante encontro de fútbol, entre os equipos Sporting Guardés e Gondomar C.F., 2º e 3º respectivamente, na táboa clasificatoria.

 O conxunto visitante, ten 39 puntos, logrados en 12 vitorias e 3 empates. 

 O conxunto local, contabiliza 41 puntos, obtidos en 13 xornadas vitoriosas e 2 con resultado de empate.

 Tanto un como outro equipo, coñeceron á derrota en 4 ocasións, no que vai de liga.

 As diferencias son, como pode apreciarse, mínimas. Especialmente se observamos o número de goles de cada equipo: o conxunto do Val Miñor  marcou 52 goles e encaixou 20; e o conxunto do Baixo Miño, marcou 45 goles e encaixou 25. Dese xeito, a diferencia é favorable ao Gondomar C.F..

 Todo iso, pode darnos unha idea do potencial de cada equipo, de tal xeito que tanto os xogadores visitantes como os locais son conscientes de que o tempo de xogo deben aproveitalo deportivamente da mellor maneira para tentar alzarse coa vitoria. Os de A Guarda, para manter o chanzo actual e os de Gondomar para aspirar a poder gabear ata o 2º posto da táboa, ou cando menos para non baixar do chanzo actual.

  Con eses vimbios, os seareiros dun e doutro equipo, terán oportunidade - se a climatoloxía non o impide - de gozar dun partido de fútbol de sa rivalidade comarcal, no que a vitoria final pode lograla calquera dos dous equipos, que son, por certo, vellos coñecidos na competición ligueira.

Calendario das demais categorías do Sporting Guardés para esta fin de semana