A GUARDA

Ornamentos do taller ‘Tecendo A Guarda’  enchen as rúas de cor e temática mariñeira 

  

Dúas donas, participantes no obradoiro “Tecendo A Guarda”, colocando os seus traballos de ornamento na praza de Avelino Vicente, en presenza do alcalde Roberto José Álvarez Carrero e do concelleiro Óscar Alonso Álvarez

Foto: C.A.G.

Infogauda / A Guarda

 O obradoiro “Tecendo A Guarda” encherá de cor e adornos mariñeiros durante este verán algunhas rúas e prazas máis concorridas da Guarda.   

 O taller celébrase no Club de Xubilados e Pensionistas de A Guarda e tivo unhas 15 participantes. O programa ten varios obxectivos: a dinamización do ocio, unha maior socialización das persoas participantes e que estas se sintan partícipes da vida comunitaria.  

 O proxecto ademais pretende dinamizar a vida na rúa, pois converte as prazas e rúas en lugares máis atractivos e estéticos. Este ano, tiveron en mente o medio ambiente, e utilizaron materiais reciclados, como cartóns de leite ou arames, para elaborar gran parte dos adornos.   

 Xa se poden ver parte do seu traballo pola praza de Avelino Vicente; en parte de Concepción Arenal ou na praza situada na intersección das rúas Galicia e Vicente Sobrino. Con todo aínda quedan máis adornos que colocar e que contribuirán a embelecer a nosa vila este verán.