CULTURA

Música e Palabras: unha noite para compartir cultura, amizade e emocións en Camposancos

Mario Baró nun momento da súa intervención, acompañada coa música da guitarra de María José Baz

Foto: José Fernando Martínez

Ricardo Rodríguez Vicente/Camposancos 

 A noitiña deste venres, a Casa de Montes Veciñais en Man Común de Camposancos converteuse nun fermoso punto de encontro para a cultura, a palabra e a música. Unha nova edición de Música e Palabras reuniu persoas veciñas de Camposancos, A Guarda e O Rosal nun ambiente de perfecta amizade, harmonía e convivencia.  

 Ao longo da velada, as persoas asistentes tiveron a oportunidade de escoitar con atención e interese as intervencións de Mario Baró, Francisco Álvarez (Koki), Sonia Bernardini, María José Alonso, Malula Cendón e María José Baz, que, coas súas achegas, contribuíron a dar forma a un encontro no que a palabra foi protagonista e a sensibilidade e a cultura atoparon un espazo compartido.

 Como xa vén sendo habitual, a xuntanza desenvolveuse nun ambiente próximo e distendido, deses nos que o importante non é só o que se di, senón tamén a maneira de escoitar, compartir e sentirse parte dunha comunidade. Houbo lugar para a atención, a conversa, o intercambio de impresións e, sobre todo, para ese pracer tan necesario de reunirse arredor da cultura e da boa compañía.  

 Porque Música e Palabras é moito máis ca unha actividade cultural. É un espazo aberto ao encontro entre persoas, á expresión libre, á amizade e á convivencia. Unha oportunidade para facer unha pausa na rutina, descubrir outras voces, compartir sensibilidades e comprobar que a cultura tamén se constrúe desde a proximidade e os pequenos momentos que nos unen.

 A edición celebrada en Camposancos deixou, unha vez máis, ese agradable sabor das cousas feitas con agarimo: a satisfacción de compartir unha noite especial, de atoparse con xente amiga e de seguir alimentando un proxecto no que a música, as palabras e as persoas camiñan da man.  

 Unha noite para lembrar e, sobre todo, para agradecer a todas as persoas participantes a súa presenza, as súas achegas e a súa disposición para seguir facendo de Música e Palabras un lugar onde a cultura nos reúne e a amizade nos fai sentir ben en boa compaña.