A GUARDA

Ao chegar xullo amplíanse as visitas guiadas ao castro do monte Santa Trega e comezan as visitas nocturnas    

Infogauda / A Guarda

 Nos meses de maior afluencia, xullo e agosto, amplíase a oferta con visitas de martes a domingo e 4 quendas ao día (12:00, 13:00, 18:00 e 19:00h). Deste xeito, os visitantes interesados terán a oportunidade de coñecela cultura castrexa e a nosa paisaxe. 

 O punto de encontro é o aparcadoiro da Casa Forestal e a visita recorre menos de 1 km polas diferentes áreas escavadas durante os últimos cen anos, incluíndo a zona norte coas vivendas reconstruídas e a muralla ata a zona de Mergelina, na ladeira ao río Miño. Sempre é interesante completar esta actividade coa visita ao Museo Arqueolóxico do monte Santa Trega (MASAT).  

 Estas visitas guiadas non precisan reserva previa e son gratuítas pero aquelas persoas que accedan ao monte Santa Trega en vehículo deberán abonar o prezo público. A novidade desta temporada é a visita nocturna de Historias e petróglifos que se realizará cada martes dos meses de xullo e agosto.   

 A proposta é dar a coñecer as lendas e historias percorrendo a área norte do castro e que incluirá a visita ao petróglifo Laxe Sagrada e mapa. O punto de encontro é o mesmo, o aparcadoiro da Casa Forestal, pero para esta visita nocturna si é preciso realizar inscrición previa, desde o xoves anterior. Tramitarase desde o Museo Arqueolóxico do monte Santa Trega (MASAT), no WhatsApp 690 01 70 38 para 4 persoas máximo por petición ou unidade familiar.  

 No mes de setembro regresarán as visitas guiadas regulares nas fins de semana ás 12:00h.  

 Para calquera dúbida poden consultar directamente no Museo Arqueolóxico no teléfono 690 01 70 38 ou un correo electrónico a masat@aguarda.es.