PONTEVEDRA

Tras a sentenza do Tribunal Supremo que desestima o recurso da Consellería de Sanidade  

O COLECTIVO FARMACÉUTICO DEFENDE O LABOR DOS FARMACÉUTICOS DE ATENCIÓN  PRIMARIA NA RENOVACIÓN DE TRATAMENTOS CRÓNICOS    

• O Colexio de Farmacéuticos de Pontevedra quixo subliñar que o Farmacéutico de Atención Primaria é un profesional sanitario experto no medicamento que forma parte do equipo multidisciplinar de Atención Primaria, o que ofrece as máximas garantías de calidade, eficiencia e seguridade para os pacientes   

 

Infogauda / Pontevedra 

 A desestimación polo Tribunal Supremo do recurso contra a sentenza do Tribunal Superior de Xustiza de Galicia que deixaba sen efecto a Resolución do Xerente do Servizo Galego de Saúde de data 8 de outubro de 2021 que aprobou a “Instrución sobre continuación do tratamento crónico do farmacéutico de Atención Primaria en situacións especiais”, “supoñerá - segundo afirman dende o Colexio de Farmacéuticos de Pontevedra - un retroceso na continuidade dos tratamentos crónicos dos pacientes e, polo tanto, un aumento da carga de traballo diaria dos centros de saúde e das farmacias”.    

 Desde o Colexio de Farmacéuticos de Pontevedra lembran que “a aplicación desta Instrución, que posibilita a renovación dos tratamentos crónicos polos Farmacéuticos de Atención Primaria aos pacientes que, por diversos motivos, non dispoñen de cita a tempo co seu médico, leva suspendida desde o mes de agosto o que provocou de novo importantes atrasos para conseguir citas médicas para renovar as receitas, situación que todo apunta a que persistirá no tempo tras a resolución do Tribunal Supremo.  

 O Colexio de Farmacéuticos de Pontevedra quixo poñer en valor o labor dos farmacéuticos de Atención Primaria durante o período que estivo vixente a Instrución, sinalando que as súas funcións circunscribíanse a dar continuidade ás prescricións crónicas iniciadas polo médico e evitar que os pacientes se visen  obrigados a interrompelas cos prexuízos consecuentes na súa saúde, á vez que se facilitaba igualmente o seu labor aos farmacéuticos comunitarios, que para dispensar están obrigados a dispoñer da correspondente receita oficial imprescindible.     

 O feito de que o Farmacéutico de Atención Primaria sexa un profesional sanitario experto no medicamento que forma parte do equipo multidisciplinar de Atención Primaria ofrece as máximas garantías de calidade, eficiencia e seguridade para os pacientes, afirma o Colexio provincial.    

 Tras o rexeitamento da xustiza á medida adoptada pola Consellería de Sanidade, o Colexio de Farmacéuticos de Pontevedra ofrécese a continuar traballando xunto coa administración sanitaria para buscar medidas que dean solución á continuidade dos tratamentos dos pacientes e axuden a desconxestionar o sistema de citas cando se trata da renovación de receitas”.