As 40 voces de Mistura Vocal, en concerto este domingo 22 no Rosal
• Será ás 19.00 horas no Auditorio do Rosal con entrada de balde
Infogauda / O Rosal
A música encherá O Rosal esta fin de semana. O domingo 22 de outubro, ás 19.00 horas, o auditorio municipal acollerá o concerto de Mistura Vocal, un coro formado por 40 voces da zona de Baixo Miño, Condado e Vigo e dirixido por Aloia Martínez, que farán as delicias do público rosaleiro co seu variado repertorio. A cita será con entrada de balde.
Sobre o escenario desenvolverán a súa característica elegancia musical, a súa serenidade estética, a súa sensibilidade e unhas dotes artísticas que confiren a este colectivo semi ou profesional un nivel envexable que conquista a todas e todos os oíntes.
Na súa curta vida contan cunha exitosa traxectoria con múltiples e prestixiosos premios, galardóns obtidos tanto en Galicia como en diversos lugares de España. Tamén é recoñecido o seu labor na creación e realización de espectáculos, que sempre acollen unha grande afluencia de público.
Organizado pola Agrupación Musical do Rosal, o concerto contará cun repertorio integrado por obras de diferentes estilos e épocas, sen esquecer a autoras e autores galegos.
.jpeg)
Ningún comentario:
Publicar un comentario