A PRAGA DE MOSCAS: UN GRAVÍSIMO PERIGO PARA A SAÚDE PÚBLICA
Está afectando moi seriamente ás persoas que demandan solucións e que se sinten abandoadas polo Goberno municipal de Tomiño
Grupo Municipal do PSdeG-PSOE de Tomiño
O Grupo Municipal do PSdeG-PSOE de Tomiño volve a denunciar, unha vez máis, a gravísima situación de saúde pública que está a padecer a veciñanza do noso concello a causa da praga de moscas que invade as nosas parroquias.
Na tarde de onte puxéronse en contacto con nós veciños e veciñas, neste caso da parroquia de Forcadela, para informarnos da terrible situación que están a vivir pola praga de moscas que está afectando seriamente o seu día a día e a súa calidade de vida, pondo en risco mesmo a súa saúde.
A voceira socialista, Violeta de Santiago, esixe respostas e accións ao Goberno municipal nacionalista que está desaparecido e non actúa neste grave problema.
Qué pasa con ese famoso estudo encargado a Universidade de Vigo? Estáse traballando realmente nel? Hai conclusións? Se as hai, cal é o motivo de non facelo público e actuar para atallar esta invasión?
Por outra banda lembra Violeta de Santiago, que hai tres meses, en precampaña electoral, foi constituida unha mesa de traballo - á que, unha vez máis, non fomos convocadas para participar -, e da que nada se sabe. A cidadanía vai moi farta de anuncios electoralistas que non achegan solucións aos seus problemas e demandan información, transparencia e acción xa.
Por último, as concelleiras socialistas lembran á señora alcaldesa, que baseou a súa campaña electoral decindo que as persoas estarían no centro da acción política e que poría corazón. Non é precisamente o que está a facer nin a demostrar, pois esta praga está afectando moi seriamente ás persoas que demandan solucións e que se sinten abandoadas por este Goberno municipal, polo que lle esiximos que se poñan a traballar e que deixen de darlle as costas ás veciñas e veciños.
.jpeg)
Ningún comentario:
Publicar un comentario