O ROSAL

O Concello inaugurou en Pías a súa clara aposta polas escolas unitarias  

Este domingo presentouse á veciñanza unha reforma integral do centro que se implementará progresivamente no resto do CRA María Zambrano  

Búscase a posta en valor da educación de proximidade e a recuperación de edificacións de gran valor patrimonial no camiño da sostibilidade ambiental

A alcaldesa do Rosal. nun momento da súa intervención, en presenza das nenas e nenos da escola unitaria de Pías, así como das nais, pais e familiares do alumnado

Fotos: C.O.R.

Un momento da representación ‘Staccato & Legato’ de Maga da Voz, un contaconto do libro de Marisa Núñez ‘Lucinda e o inspector vinagre’ no que as familias participaron activamente a través de diversos xogos de música, movemento e expresión corporal para experimentar e integrar as emocións que unen e separan

Infogauda / O Rosal

 O Rosal celebrou a pasada fin de semana unha exitosa xornada de portas abertas para presentar á veciñanza a reforma integral da escola unitaria de Pías, o primeiro gran paso na estratexia do Concello de reforma progresiva de todos os centros do CRA María Zambrano. “A transformación deste edificio é un exemplo da clara aposta que facemos dende o Goberno municipal non só pola educación de proximidade, senón tamén pola recuperación de inmobles de gran valor patrimonial seguindo sempre a liña da eficiencia enerxética e a sostibilidade medioambiental”, explicou a alcaldesa, Ánxela Fernández Callís.

 Neste sentido, o Concello está a facer un grande esforzo para captar fondos para a modernización destes centros nos que a única competencia que ten é de mantemento. Pero, como salientou a rexedora, “queremos ir moito máis alá. O noso obxectivo é apostar por ese modelo educativo diferencial que temos no noso municipio, un modo tamén de fixar poboación e manter viva a contorna. E para iso iremos reformando de forma integral todas as unitarias, evitando o posible deterioro estrutural de edificios únicos e mantendo as aulas en condicións óptimas e de confort para alumnado e docentes”.

 Durante as obras de reforma, nas que se investiron arredor de 200.000 euros,  implementáronse tamén medidas para facer da escola un centro máis sostible. Así, instaláronse medidas que axudan a reducir ao mínimo o consumo enerxético, como a renovación completa do sistema de alumeado interior e da carpintería, así como das instalacións eléctricas, de fontanería e saneamento; un novo illamento térmico e unha nova soleira que impermeabiliza o contacto co chan; o illamento do teito; a incorporación de chan radiante para substituír os radiadores eléctricos que producían un alto consumo; un sistema de aerotermia con bomba de calor de alta eficiencia ou un sistema de renovación do aire interior con ventilación mecánica e recuperación de calor para garantir a calidade de aire sen gastar enerxía na climatización.

 Deste xeito, o Concello traballa para dar solución “aos dous buratos negros de consumo que se detectaron na auditoría enerxética municipal: as luminarias públicas, para as que xa conseguimos 1,2 millóns de euros de fondos europeos para a súa renovación, e as escolas unitarias, que polo tipo de instalación teñen un consumo de enerxía moi alto”.

 A alcaldesa rosaleira quixo agradecer a colaboración da comunidade educativa, que durante a execución das obras fixeron un grande esforzo para que a reforma integral fose unha realidade. “Son un exemplo de bo facer, como demostraron durante a pandemia, con esa capacidade de adaptación única. A todas e todos os docentes, nenos e nenas desexámoslle un grande inicio deste curso post pandemia no que todo volve á normalidade”, recalcou.