A GUARDA

Logo da súa interrupción pola pandemia

A Guarda recupera a romaría de Santa Trega 

• Este venres día 23 de setembro, festivo local na vila guardesa

As mulleres veñen sendo as que portan as andas coa imaxe de santa Trega ao longo de toda á procesión, o día da súa festividade

Fotos: C.A.G.

Centenares de persoas devotas, entre elas, mariñeiros de Póvoa de Varzim, acompañan a imaxe da Virxe do Trega

Infogauda / A Guarda

 A veciñanza do concello de A Guarda e da súa contorna, prepárase para celebrar este venres día 23 de setembro (festivo local) a romaría de santa Trega, unha conmemoración que se recupera este ano despois da pandemia da Covid-19. 

 A celebración, que ten un carácter relixioso e tamén festivo, congregará no monte Santa Trega a centenares de devotos da mártir natural de Iconio, na rexión de Anatolia (Turquía) e discípula de san Pablo. Santa Trega é avogada das doenzas da cabeza e do corazón, así como do cancro óseo.

 Dende primeira hora da mañá a ermida de santa Trega acollerá a celebración de misas ás 8:00, 9:00 e ás 11:30h, a solemne, con ofrenda, sermón e procesión.  

 Este ano, se non hai causa de forza maior, contaremos coa asistencia dunha representación da cidadanía de Póvoa de Varzim, que virá tanto por  terra como por mar - neste caso a bordo da Lancha Poveira do Alto "Fé em Deus" - para asistir aos actos da festividade de santa Trega, e ao día seguinte, sábado 24 de setembro, ás 12:00 horas, na Casa do Concello de A Guarda, aos que terán lugar con motivo da Declaración do irmanamento entre A Guarda e Póvoa de Varzim.

A poxa dos froitos, congrega a moitas persoas diante do púlpito ao aire libre

 Tralo remate dos actos relixiosos celébranse as tradicionais "poxas dos froitos" - do agro e do mar -, cunha monumental torta - chamada regueifa -, formada por roscas de diferentes diámtros, e colocados de maior - na parte inferior da regueifa - a menor, formando varios andares. A regueifa, ademais da tradición que ten de por sí, gañada ao longo de moitos anos, sempre agocha no seu interior algún importante premio para a persoa agraciada que posúa o boleto premiado no sorteo que pon broche de ouro as poxas, verdadeiro vestixio medieval.

 Momentos despois das poxas, vén o tradicional xantar enxebre, onde as familias e grupos de amigos, xúntanse para comer, e logo da sobremesa, cantar e bailar ata a tardiña, o son das gaitas, acordeóns, pandeiretas e tamboríis.

 "Dende o Concello de A Guarda recórdase á poboación o deber de respectar o noso patrimonio, sinal de identidade do noso pobo, evitando o maltrato dos bens, ou acceder a zonas patrimoniais coma a citania do monte Santa Trega. Unha ocupación da zona delimitada pode provocar agresións que causen danos nas estruturas deste espazo protexido, un dos lugares máis visitados de Galicia e cun valor patrimonial e arqueolóxico único", indicaron fontes municipais. 

 "A maioría da poboación é consciente - afirman fontes municipais - que o xacemento castrexo do monte Santa Trega é un tesouro para A Guarda e para Galicia, e tamén que debemos dar unha imaxe acorde coa súa importancia e valor. Por parte do Concello e do Padroado Municipal monte Santa Trega seguiremos traballando para concienciar a poboación no respecto polo patrimonio, lembrando que é tarefa de todos mantelo en boas condicións."