GALICIA

Ábrese o prazo para presentar candidaturas ao III Premio Internacional Ramiro Carregal de Investigación en Cardioloxía

O galardón pretende contribuír a “xerar novo coñecemento en patoloxías que afectan as válvulas do corazón, que supoñen xa a terceira causa de enfermidade cardíaca”

· A convocatoria estará aberta ata o 31 de maio e conta cun premio dotado con 20.000 euros

· As candidaturas deberán presentarse enviando debidamente cubertos os modelos dispoñibles na web do premio premioramirocarregal.com/cardiologia

Autoridades participantes na gala de entrega de galardóns da primeira edición (a segunda non se celebrou aínda pola situación sanitaria) do Premio Internacional de Investigación en Cardioloxía Ramiro Carregal 

Foto: Bolanda

Teresa Rocamonde / Santiago de Compostela

 Ata o 31 de maio estará aberto o prazo para presentar candidaturas á terceira edición do Premio Internacional de Investigación en Cardioloxía “Enfermidades  valvulares cardíacas” Ramiro Carregal, dotado con 20.000 euros e galardón acreditativo. Este Premio naceu no ano 2018 froito dun acordo entre o presidente de Frinsa, Ramiro Carregal, a presidenta do Padroado da Fundación Instituto de Investigación Sanitaria de Santiago, Eloína Núñez e José Ramón González Juanatey, xefe de Servizo de Cardioloxía do CHUS e investigador do IDIS, co fin de recoñecer o labor dos investigadores e clínicos que traballan na procura dun mellor tratamento das patoloxías que afectan as válvulas cardíacas.

 Poden presentarse a este Premio investigadores básicos ou clínicos que desenvolvan a súa actividade “en centros sanitarios e/ou de investigación, públicos ou privados de Galicia, España ou calquera parte do mundo”. Para iso tan só terán que cubrir os modelos de solicitude dispoñibles na páxina web do Premio, premioramirocarregal. com/cardiologia. Trátase dun documento explicando o proxecto e outro co CV resumido do investigador principal e/ou grupo de investigación, ademais dunha declaración escrita comprometéndose a recoller o galardón persoalmente en caso de resultar premiado.

 As propostas, que deben ser orixinais e ter un carácter claramente innovador e aplicado poderán presentarse ata o próximo 31 de maio directamente a través da citada web do Premio, ao Apartado de Correos 50 de Santiago de Compostela ou no correo electrónico cardiologia@premioramirocarregal.com.

 O Dr. González Juanatey, referente mundial no tratamento das enfermidades do corazón, explica que o obxectivo do Premio é “xerar novo coñecemento en patoloxías que afectan as válvulas do corazón, que supoñen xa a terceira causa de enfermidade cardíaca”. O xefe do Servizo de Cardioloxía do CHUS asegura que nos próximos anos “viviremos unha revolución absoluta das enfermidades das válvulas do corazón”, patoloxías moi ligadas ao envellecemento e que, por tanto, supoñen “un auténtico problema de saúde” na nosa sociedade.

Premiados

 Na primeira edición o Xurado –presidido polo Dr.  G. Juanatey e composto por prestixiosos expertos en Cardioloxía–, premiou o traballo do equipo liderado polo investigador Diego López Otero e titulado “Impacto prognóstico da amiloidose cardíaca en pacientes con estenose aórtica severa sometidos a implante percutáneo de válvula aórtica”. Na segunda edición, cuxo acto de entrega tivo que ser atrasado pola pandemia, foi premiado o Dr. Carlos Peña Gil polo seu proxecto “Mellora continua da calidade na xestión integral do proceso de estenose aórtica sintomática”.