CAMPOSANCOS (A GUARDA)

Camposancos celebrou a Noite de San Xoán

• Coa participación da veciñanza e a actuación do Grupo Lirolai

José Fernando Martínez Martínez, presidente da xunta reitora da Comunidade de Montes Veciñais en Man Común de Camposancos, nun momento da súa intervención

Fotos: Cedidas

Vistas da asistencia de público a celebración da Noite de San Xoán

Infogauda / Camposancos

 Organizada por Comunidade de Montes Veciñais en Man Común de Camposancos e a Asociación Cultural Rego de Bicosán, onte tivo lugar na Casa de Montes de Camposancos, a celebración de Noite de San Xoán.

 Presentou a festa José Fernando Martínez Martínez, presidente da xunta reitora da devandita Comunidade de Montes de Camposancos, facendo fincapé “en que despois de moitos anos, quizais poidera ser esta a derradeira, debido a que a avaricia dos veciños da parroquia de Salcidos tentan arrebatarnos no xulgado a propiedade da totalidade do monte iniciando, por detrás, un proceso xudicial. 

 En fin hoxe [por onte luns, 23 de xuño] estamos de festa, e nesta ocasión é a das cacharelas ou fachos. Non esquezamos que o lume cambiou a nosa forma de vivir”. 

 Asemade, non esqueceu lembrar que “no día do solsticio de verán non debemos mirar pra outro lado e esquecer que hai cacharelas destructoras, xenocidios, guerras Gaza, Irán,...”.   

 Rematou dicindo que “as nosas cacharelas son de liberdade e pedindo cordura os políticos”. 

O Grupo Lirolai nun momento da súa actuación

Ese era o ambiente durante a actuación do grupo Lirolai

  A continuación comezou a actuación do Grupo Lirolai, tocando fermosas pezas do seu repertorio de música tradicional, como: Pasodobre por ti, Millo verde, Canción do mariñeiro, San Martiño,  Muiñeira de Sabaxans, A miña burriña, Rumba do Muiño, Pasodobre de Fonteferreira, Durme ben, A Cabaqueira, Rumba e Media, O Salon Parroquial, Recunchos rosaleiros, Pasodobre antigo, Portuguesiña,..., recollidas nos seus traballos discográficos "De vila en vila" e "Lirolai".

 Dese xeito, malia a todo, a música e as cantigas xeraron a ledicia do respectable público - formado maioritariamente por persoas veciñas de Camposancos - uníndose a maxia da Noite de San Xoán, motivando unha fermosa foliada arredor da cacharela.