DEPORTES

REMO

O porto de A Guarda acollerá a regata de bateis XXI Bandeira Concello de A Guarda – Memorial Antonino Torrón 

O sábado día 19 de marzo, ás 16:00 horas

O alcalde da Guarda (3º pola esq.) e concelleira de Deportes; co representante da xunta directiva do Clube de Remo Robaleira (1º pola der.) e o representante de ORPAGU, patrocinador principal do Clube de Remo Robaleira, no acto de presentación da regata XXI Bandeira Concello da Guarda - Memorial Antonino Torrón

Foto: C.A.G.

Infogauda / A Guarda

 Na tarde deste mércores 16 de marzo, na Casa dos Alonso, presentouse ante os medios de comunicación a regata de bateis XXI Bandeira Concello de A Guarda - Memorial Antonino Torrón, acto ao que asistiron Antonio Lomba Baz, alcalde de A Guarda; Mª Montserrat Magallanes Álvarez, concelleira de Deportes; Fernando Rodríguez Freitas, representante da xunta directiva do Clube de Remo Robaleira e Jesús Manuel Pérez Martínez, representante de ORPAGU, patrocinador principal do Clube de Remo Robaleira. 

 A regata de bateis XXI Bandeira Concello de A Guarda - Memorial Antonino Torrón disputarase na xornada do sábado día 17 de marzo a partires das 16:00h no porto guardés. Trátase dunha regata encadrada na liguilla da zona sur de Galicia, e na que participan diversos equipos do Grove, Bueu, Cangas, Moaña, Vigo, Redondela e A Guarda. 

 Na proba, aberta para todas as categorías dende alevín ata senior, masculino e feminino; ademais de medallas para os tres primeiros de cada categoría, dispútase a bandeira, o premio máis relevante, á que se concursa por puntos, sendo o equipo con máis e mellores postos o gañador dese cobizado trofeo.  

 A concelleira de Deportes, Mª Montserrat Magallanes, valorou moi positivamente a celebración desta regata no porto da vila, un evento deportivo que congregará a máis de 350 deportistas en 70 tripulacións nas diferentes categorías de competición. 

 Antonio Lomba, alcalde de A Guarda, confirmou a súa asistencia á entrega de premios, que terá lugar a partires das 18:30h no paseo marítimo do porto pesqueiro da nosa localidade.

 Dende o Concello de A Guarda e dende o Clube de Remo Robaleira, convídase a toda a cidadanía guardesa e visitantes a animar aos deportistas nesta xornada no porto de A Guarda.