A GUARDA

Abertas as inscricións para unha xornada Atlantic CultureScape 

• De posta en valor do patrimonio cultural de A Guarda

• O evento está aberto a toda a cidadanía e terá lugar na tarde do vindeiro 10 de marzo no Concello de A Guarda 

Un dos lugares máis pintorescos de A Guarda é o barrio de pescadores e o porto pesqueiro - Foto: Infogauda

Infogauda / A Guarda

 O vindeiro mércores día 10 de marzo o Concello de A Guarda acollerá unha xornada organizada pola Universidade de Vigo, enmarcada no proxecto Atlantic CultureScape, co-financiado polo Programa Interreg Atlantic Area a través do Fondo Europeo de Desenvolvemento Rexional (FEDER), "para a co-creación de solucións para a posta en valor do patrimonio cultural de A Guarda". 

 Esta xornada, que comezará ás 16:30 h. - e rematará arredor das 19:30 h.-, ten coma obxectivo "contribuír a crear novos produtos e servizos que poidan ser comercializados polos profesionais e entidades da zona para dinamizar e atraer novos viaxeiros ao concello".  

 A xornada estará dividida en dúas partes. Na primeira delas realizarase unha charla con expertos sobre o Patrimonio Cultural Inmaterial de A Guarda e boas prácticas no sector e, despois dunha breve pausa, realizaranse mesas de traballo nas que os asistentes poderán traballar no desenvolvemento de novos produtos e servizos turísticos para o territorio.  

 O evento está aberto a toda a cidadanía, motivo polo cal todas aquelas persoas, sexan profesionais ou non, e que desexen desenvolver ou participar en proxectos para a creación de novos produtos turísticos, atraer turismo á Guarda, potenciar a nosa cultura ou dar a coñecer o noso patrimonio, teñen unha oportunidade moi especial nesta xornada, na que participarán expertos coma o historiador Joaquín Miguel Villa Álvarez e investigadores da Universidade de Vigo, socia deste proxecto europeo.  

 As inscricións pódense realizar a través do enderezo electrónico atlanticculturescape.aguarda@gmail.com ou no teléfono 886 212 131

 Atlantic CultureScape

 Atlantic CultureScape lanzouse en xullo de 2019, reunindo a varias entidades asociadas para desenvolver colectivamente experiencias de patrimonio cultural inmaterial (ICH, polas siglas en inglés) que impulsarán a oferta turística na área Atlántica. 

 O proxecto identificará que  ICH ten cada país, levará a cabo unha investigación de  ICH e traballará con empresas locais para mellorar a súa  ICH local. Nas etapas finais do proxecto, comercializarase un Roteiro do Espazo Atlántico ICH aos visitantes do Espazo Atlántico.  

 Unha parte importante da preocupación dos proxectos Interreg son os socios  transnacionales que se unen para lograr un obxectivo común.

O patrimonio como atractivo para novas experiencias

 Atlantic CultureScape ten como obxectivo desenvolver experiencias vendibles do patrimonio cultural inmaterial en todo a área Atlántica. Ao traballar con provedores locais de ICH e empresas turísticas, estas experiencias centradas nos visitantes volverán conectar ás persoas coa paisaxe e a cultura da área Atlántica.

A GUARDA: UN POBO NO BERCE DO TREGA, ARROLADO POLO MAR E POLO RÍO 

 Ao sueste da Galiza, o río Miño, o monte Santa Trega e o océano Atlántico custodian a localidade de A Guarda. A historia deste territorio está en gran medida condicionada polo seu singular emprazamento xeográfico.  

 O monte Santa Trega protexe á comunidade. Un castro no seu alto móstranos a longa historia destas terras. Un poboado amurallado con portas ao norte e ao sur. Nel atopamos restos de vivendas, lendas, petróglifos, contos, fornos e outros artefactos arqueolóxicos.  

 O Miño trae o substrato da terra que desauga no océano, alí mesmo, xunto ao monte. Ecosistemas que acollen saberes ligados a un río, cantares vellos que resoan hoxe.  

 As augas do Atlántico nutren as súas xentes, que durante milenios construiron vidas ligadas ao mar. Augas salgadas que abastecen o alimento necesario para a vida, o arghazo co que abonar as leiras, palabras coas que nomear o vento. Vidas mariñeiras ligadas a un océano que dá, mais tamén leva.  

 Terra das artes do mar, que enfían redes e tallan barcos en madeira ao son dos cantos de taberna.

Nota da Redacción de Infogauda:  o texto precedente - agás o título do mesmo - está baseado  nunha publicación redactada por Atlantic CultureScape, da Universidade de Vigo.