A GUARDA

Iniciativa do BNG no Congreso dos Deputados, a prol da arte do xeito  

Anxo Lois Baz (portavoz municipal do BNG na Guarda): “Levamos esta iniciativa ao Parlamento español, porque non é xusto castigar aos nosos mariñeiros con cotas absurdas ao ser, o xeito, un arte de pesca sustentábel”  

Néstor Rego Candamil, deputado do BNG por A Coruña, e Anxo Lois Baz Vicente, portavoz municipal do BNG, no Concello de A Guarda

Fotos: Cedidas / BNG

Infogauda / A Guarda

 O deputado do BNG por A Coruña, Néstor Rego Candamil, que forma parte do Grupo Parlamentario Plural no Congreso dos Deputados, e está adscrito - entre outras - a Comisión de Agricultura, Pesca e Alimentación -, “vén de presentar dúas iniciativas: unha proposición non de lei ante a Mesa do Congreso e unha batería de preguntas ao goberno español, sobre a arte de pesca do xeito”. 

 “Dende o BNG, en sintonía co sector, considérase que o xeito é un arte artesanal de pesca de enmalle moi selectiva, na que o 85% das capturas corresponde á sardiña. É sustentábel polo que se entende que debe estar fóra de Tacs e cotas”, afirmou Néstor Rego. 

 A formación nacionalista denuncia que “esta actividade pesqueira ancestral e respectuosa coa biodiversidade, pode estar condenada á súa desaparición se lle aplican cotas e Tags tal e como se fai con sistemas de produción industrial, que son os que poden poñer en risco a conservación das pescarías e a biodiversidade mariña”. 

 “A nosa proposición insta ao Goberno español a eliminar a cota de capturas de sardiña para a flota do Xeito que non pon en risco á esta especie, tamén solicitamos o axuste e incremento das cantidades de captura de sardiña para esta flota”, sinalou Néstor Rego, deputado do BNG no Parlamento español. 

 Dende o BNG lembran que “esta situación afecta a unhas 427 embarcacións e a portos como os de A Guarda, Cabo de Cruz, Poio,…, entre outros”.  

 “Os nosos mariñeiros non teñen que verse afectados pola limitación da pesca da sardiña até o 31 de xullo dado que os mellores meses son xullo, agosto e setembro, e ainda por riba cunha cota diaria non acumulativa, polo que día que non se poida faenar, día que se perde de cota”, comentou o portavoz municipal do BNG, no Concello de A Guarda, Anxo Lois Baz Vicente. 

 Dende o BNG entenden que “a defensa deste sector é importante para portos como o da Guarda pola calidade do produto, pola necesidade de manter os postos de traballo nunha poboación demasiado castigada polas diferentes crises sufridas”.