AS ALCALDÍAS DA FRONTEIRA DO MIÑO REUNIRANSE O LUNS 1 DE XUÑO, PARA CONCRETAR “ACCIÓNS DE PROTESTA CONTUNDENTES E INMINENTES” COAS QUE RECLAMAR A APERTURA DE PASOS
· As principais pontes de conexión entre Pontevedra e o Norte de Portugal locen hoxe pancartas reivindicativas do AECT Rio Minho para visibilizar a indignación da cidadanía da ‘raia’
· Rexedores e rexedoras galegas e lusas aseguran que “a inacción” das administracións competentes “esgotou a súa paciencia”
Na imaxe, unha das pancartas reivindicativas colocadas na Ponte da Amizade, entre Goián (Tomiño) e Vila Nova de Cerveira
Foto: D.PO.
Infogauda / O Baixo Miño / O Condado
Alcaldes e alcaldesas da fronteira do río Miño esgotaron a paciencia. O vindeiro luns día 1 de xuño, tal e como tiñan anunciado esta semana, os/as mandatarios de A Guarda, O Rosal, Tomiño, Salvaterra, As Neves, Arbo, Crecente, Caminha, Vila Nova de Cerveira, Valença do Minho, Monçao e Melgaço, xunto co AECT Rio Minho reuniranse “para concretar as accións de protesta que desenvolverán de maneira conxunta e inminente despois de que o ultimátum para a apertura de máis pasos fronteirizos con Portugal non fose atendido”.
Como paso previo ás mobilizacións que se realizarán nesta semana que entra, o AECT Rio Minho vén de colocar nas principais pontes entre Pontevedra e Portugal pancartas solicitando a reapertura dos pasos fronteirizos. O obxectivo destas faixas (colocadas nas varandas e nos valados que cortan a circulación nos viadutos) é facer visible a indignación de toda a cidadanía da ‘raia’, que en moitos casos está obrigada a dar rodeos de ata 200 quilómetros para acudir aos postos de traballo, ve como non ten público nos seus negocios, e sufre de separación social a pesares de que no día a día a súa relación é tan estreita como dentro dun mesmo municipio.
Como xa dixeran os/as rexedores/as das Eurocidades do Miño, nestes momentos o territorio está totalmente asfixiado, e non se entende como, a pesares da singularidade das relacións (é o treito de fronteira con máis mobilidade entre ambos estados e o que suma máis poboación), as administracións competentes non teñen movido ‘ficha’ e flexibilizado o peche dos pasos. “A gota que vén de colmar o vaso”, segundo explica o director do AECT Rio Minho, Uxío Benítez, “foi o anuncio da apertura doutros tres pasos a partires do vindeiro luns a nivel estatal, un deles en Ourense, entre os municipios de Tourém e Calvos de Randín, onde a veciñanza poderá circular sen restricións en determinados días e franxas horarias”.
“Como é posible que se abran pasos noutros lugares, e na franxa máis activa social e economicamente falando sigane sigan as limitacións nun momento no que a situación sanitaria é xa moito mellor e igual en ambas marxes do río? As consecuencias económicas están a ser incalculables”, subliñou Benítez. O deputado nacionalista, en contacto directo con todos e todas as alcaldesas destaca que o sentir dos mandatarios é de “total frustración” ante “a ausencia de resposta tanto polo Goberno central como por parte da Xunta de Galicia, que non intercedeu nin deu pasos para solucionar a problemática”.
Benítez manifestou “o apoio total ás reividicacións que onte realizaron o alcalde de Tui e o presidente da Câmara de Valença do Minho pedindo a apertura peonil da ponte vella”. Destacou que ambos rexedores estarán presentes tamén nas protestas conxuntas que se desenvolverán esta semana.
Hai que lembrar que o AECT iniciou as reclamacións da apertura de pasos coa sinatura dunha declaración formal o pasado 28 de abril por parte das alcaldesas e alcaldes da raia. O documento foi remitido ao goberno central e ás delegacións, á Xunta de Galicia, así como a diversas entidades co fin de buscar solucións inmediatas para a grave situación socioeconómica. O AECT Rio Minho, personalizado no seu director, Uxío Benítez, e no seu vicedirector, reuniuse nos días pasados co propio delegado do Goberno en Galicia, quen tramitou a solicitude de apertura de pasos aos Ministerios de Sanidade e Interior “sen ter unha resposta frutífera”.
Ningún comentario:
Publicar un comentario