PONTEVEDRA

#COVID-19 

O CAAN da Deputación de Pontevedra mantén a súa actividade pero ten suspendidas as adopcións e restrinxe a lacería aos casos de atención necesaria  

Inclúese a recollida de animais feridos, dos potencialmente perigosos, dos mantidos en instalacións municipais non habilitadas e dos animais libres que poidan causar accidentes, así como as actuacións requiridas polo poder xudicial e os corpos e forzas de seguridade

O Centro de Acollida e Protección de Animais da Deputación de Pontevedra na Armenteira, o CAAN, está pechado ao público desde o decreto do estado de alarma

Foto: D.PO.

Infogauda / Pontevedra 

 O Centro de Acollida e Protección de Animais da Deputación de Pontevedra na Armenteira, o CAAN, está pechado ao público desde o decreto do estado de alarma establecido pola COVID-19 e, polo tanto, as adopcións de cans e cadelas están suspendidas, aínda que o centro mantén os servizos mínimos de xeito permanente para o servizo de lacería.  

 O CAAN, que sostén a súa actividade de atención e coidado aos 300 cans e cadelas que acolle actualmente, restrinxiu as recollidas aos casos de atención necesaria: aqueles con animais feridos, animais potencialmente perigosos, animais mantidos en instalacións municipais non habilitadas para o seu coidado, animais libres que poidan causar accidentes ou lesións e actuacións de emerxencia requiridas polo poder xudicial e polos corpos e forzas de seguridade. No caso de entrega de animais ás súas propietarias e propietarios, esta realízase con cita previa e de xeito individual.  

 Desde que entrou en vigor o estado de alarma realizáronse sete recollidas de animais dentro destes supostos nos concellos de Marín, Caldas de Reis, Redondela, Nigrán (2), Baiona e Meaño. En tres casos (Marín, Caldas de Reis e un dos de Nigrán) os cans puideron ser devoltos aos seus fogares.  

 No centro reduciuse a presenza física ao mínimo persoal necesario, que traballa coas medidas hixiénicas e as distancias de seguridade en quendas diferenciadas por actividades. Así mesmo, establecéronse servizos indispensables para a limpeza das instalacións e a alimentación e atención veterinaria permanente dos animais.