Medio Ambiente e Cemma renovan o convenio para recuperar e asistir a tartarugas e mamíferos mariños varados no litoral galego
A conselleira de Medio Ambiente, Territorio e Vivenda e o presidente de Cemma asinaron a renovación desta colaboración para o desenvolvemento de accións conxuntas que garantan o coidado e conservación destes animais incluídos, moitos deles, no listado de especies en réxime especial protección
As actuacións propostas neste convenio céntranse na detección de animais varados na costa galega, a prestación dos primeiros auxilios e a identificación, cando proceda, das causas do falecemento
Infogauda / Santiago de Compostela
A Xunta de Galicia, a través da
Consellería de Medio Ambiente, Territorio e Vivenda, renova o compromiso
acadado coa Coordinadora para o estudo dos mamíferos mariños (Cemma)
para a asistencia e recuperación deste grupo de animais que con
frecuencia varan no litoral de Galicia. Deste xeito, a Consellería do
Medio Ambiente e Ordenación do Territorio destinará, en 2020, 40.000
euros para manter as accións que, de forma conxunta, se veñen
desenvolvendo para garantir o coidado e conservación dos réptiles e
mamíferos mariños.
A conselleira de Medio Ambiente, Territorio e
Vivenda, Ángeles Vazquez, e o presidente da Coordinadora para o estudo
dos mamíferos mariños (Cemma), Jose Antonio Martínez Cedeira, veñen de
renovar o convenio de colaboración que, en liñas xerais, propón
actuacións centradas na comunicación e detección de episodios de
varamentos de tartarugas e mamíferos mariños na costa galega, a
prestación de coidados e primeiros auxilios aos exemplares vivos, así
como o seu tratamento veterinario, hospitalización e alimentación; e a
identificación das causas da morte nos casos que proceda. Cómpre
salientar que moitos destes animais están incluídos no listado de
especies en réxime de protección especial recollido no Catálogo de
especies ameazadas.
A sinatura deste convenio, que se vén
renovando ano a ano, responde a un obxectivo común de defensa e
promoción da conservación dos hábitats e especies en Galicia, así como o
estudo sobre o seu comportamento, as causas da perda de exemplares e
medidas que revertan esta situación.
A Coordinadora para o estudo
dos mamíferos mariños, Cemma, é unha organización sen ánimo de lucro que
vén colaborando activamente na asistencia e recuperación dos animais
varados na costa galega dende o ano 1999. Esta asociación, que dispón
dun centro de tratamento veterinario en Nigrán e dúas unidades móbiles,
foi creada co fin de fomentar accións que contribúan á conservación das
tartarugas e mamíferos mariños.
Galicia alberga unha parte moi
importante de litoral, onde destacan especialmente dúas especies de
cetáceos: a toniña (Phocoena phocoena) e o arroaz (Tursiops truncatus);
así como a tartaruga mariña común (Caretta caretta), dado o seu status
de protección como “vulnerables” no Catálogo galego de especies
ameazadas.
Anualmente varan nas costas de Galicia unha media de
280 exemplares de especies de réptiles e mamíferos mariños, estando
moitas deles incluídas no listado de especies en réxime de protección
especial e no Catálogo español de especies ameazadas.
Un 10 % dos
animais varados son recollidos con vida, o que fai necesario a súa
asistencia e rehabilitación inmediata como medida imprescindible para
contribuír á súa conservación. Asemade, o estudo dos cadáveres do resto
de exemplares reporta información imprescindible para a adopción das
medidas axeitadas para poder actuar sobre as causas directas e
indirectas de ameaza sobre estas especies.
Ningún comentario:
Publicar un comentario