A GUARDA

ARQUEOLOXÍA

Remataron os traballos de escavación do cuncheiro do poboado castrexo do Monte Santa Trega 

Agora ábrese unha segunda fase de investigación no laboratorio, onde os arqueólogos van a estudar os restos recollidos

Antonio Lomba Baz, alcalde en funcions do Concello de A Guarda; Montserrat Magallanes Álvarez, deputada provincial e Manuel Javier Crespo González, concelleiro de Patrimonio en funcions, con Brais Xosé Currás Rúa e os arqueólogos que traballaron na escavación do cuncheiro

Foto: C.A.G.

Infogauda / A Guarda

 O Concello de A Guarda promoveu, baixo a dirección de Brais Xosé Currás Refojos da Universidade de Coimbra (CEAACP), un Proxecto de Escavación, Análise e Sinalización do Cuncheiro do Monte Santa Trega.   

 O proxecto de escavación foi executado polos arqueólogos da empresa Terra Arqueos, mentres que para o estudo do material do cuncheiro contarase co grupo de investigación en zooarqueoloxía da Universidade de León con Carlos Fernández Rodríguez á fronte, e máis co grupo de investigación en arqueobioloxía da Axencia Estatal Consejo Superior de Investigaciones Científicas (CSIC), con Marta Moreno García.  

 Xunto á porta de entrada no castro do Monte Santa Trega desde o sur consérvanse os restos un antigo cuncheiro, un espazo onde os habitantes do poboado botaban os restos da súa produción. Composto fundamentalmente por cunchas, conserva tamén restos de osos e espiñas de peixe, e tamén outras evidencias como restos cerámicos ou metálicos e calquera outro tipo de refugallo. As condicións artificiais que crea o propio cuncheiro, máis favorables que o chan ácido do substrato granítico, permiten que eventualmente se poidan conservar tamén outro tipo de restos como pode ser, por exemplo, a madeira.  

 O que non é máis que un vertedoiro para as persoas que viviron no Trega, é hoxe para nós un tesouro e unha fonte de información de valor incalculable.  

 A través do estudo dos cuncheiros podemos saber moito da vida cotiá das xentes que viviron nos castros. Sabemos que tipo de animais criaban, que especies cazaban, e como eran as prácticas de pesca e marisqueo. Deste xeito, podemos chegar a saber os lugares ata onde se desprazaban desde o poboado para captar os seus recursos.  

 Logo de varias semanas de traballo a equipa de investigadores desprazados ata o Monte Santa Trega rematou a escavación, uns traballos que permitiron redescubrir as realizadas nos anos 30 do pasado século por Cayetano Mergelina Luna, e que agora, deixan á vista a muralla e a porta sur do castro.  

 A análise polo miúdo das especies tamén nos di moito sobre as prácticas de consumo. Podemos chegar a comprender se o gando vacún se empregaba para produción cárnica, como forza de tiro ou para o aproveitamento do leite. O tamaño dos animais nos informa sobre o grado de desenvolvemento gandeiro. Podemos saber cal era a importancia da caza -si é que tiña algunha-, etc.  

 O estudo da evolución dun cuncheiro no tempo, en suma, pode ser unha mostra representativa do proceso histórico de configuración e evolución das comunidades castrexas desde a Idade do Ferro ata a súa submisión ao poder de Roma e das transformacións que implica para as formas de produción e consumo.  

 Mediante a sondaxe aberta, conseguiuse documentar o cuncheiro do castro, onde os seus habitantes botaban o lixo, datando cronolóxicamente ademais o momento de construcción da súa muralla.  

 Este proxecto naceu co propósito de crear un recurso concibido como ferramenta para a promoción dun turismo sustentable e de calidade, e como medio cultural e social. Un proxecto que ofrece resultados e beneficios a diferentes niveis. Por unha banda, xerando novos coñecementos científicos a partir da análise do rexistro arqueolóxico, no marco dun programa de investigacións e actuacións arqueolóxicas. En segundo lugar, asumindo a necesidade da transferencia científica como un obxectivo prioritario, os resultados a investigación repercutirán na creación de medios para a posta en valor das evidencias arqueolóxicas.  

 A execución do proxecto permitíu levar a cabo a limpeza da vexetación da porta sur do castro do Monte Santa Trega; a realización dunha sondaxe arqueolóxica; un estudo da arqueofauna; o levantamento fotogramétrico das estruturas escavadas e a instalación de paneis informativos.  

 Agora ábrese unha segunda fase de investigación no laboratorio, onde os arqueólogos van a estudar os restos recollidos no cuncheiro para ver que tipo de animais e marisco consumían na Prehistoria, os antigos poboadores deste enclave castrexo.

 Neste proxecto participou un equipo humano composto por 10 persoas entre dirección, equipo técnico, de restauración e de análise da paleofauna, contando cun orzamento que supera os 15.000€, subvencionado polo Concello de A Guarda e a través das axudas para a rehabilitación e a sinalización do patrimonio histórico-cultural da Deputación de Pontevedra.