VIGO

SANIDADE

CIG-Saúde esixe a completa integración da Resonancia Magnética, xestionada por Galaria, na EOXI de Vigo

Máxime cando o propio Xerente do SERGAS ten recoñecido que os equipamentos que utiliza GALARIA son propiedade do SERGAS e as probas diagnosticas quen as fai é persoal estatutario.

A integración funcional posta en marcha no ano 2016 non está a permitir unha verdadeira integración da labor asistencial.

As consecuencias desta falta de integración xa comeza a afectar, dun xeito pouco tolerable, ás persoas citadas para realizar determinadas exploracións radiolóxicas. O martes 5 de xuño, pacientes citados, e con meses de espera, non foron atendidos polos profesionais que tiñan asignados, como consecuencia da negativa de GALARIA a asumir exploracións que non sexan Resonancias Magnéticas.

A non integración real consolida a permanencia do modelo organizativo e retributivo de GALARIA, no que se paga por informes radiolóxicos efectuados (isto pode ser unha parte da explicación do elevado número de Resonancias Magnéticas que se fan na nosa área en comparación con outras equivalentes) en oposición ao modelo de prestación da sanidade pública, guiado polo interese público, no que está previsto facer máis cousas que informes:

·  Xustificación da exploración: indicar a exploración máis adecuada, falar co facultativo solicitante, recitar ao paciente se se decídese realizar outra técnica.

· Codificar e planificar o estudo para que se realice da mellor forma para o paciente aportando a maior información posible.

· Ter en conta parámetros que permiten mellorar a confortabilidade e trato humano ao paciente.

· Elaborar protocolos técnicos: actualización continua, probar e implantar e implementar novas tecnoloxías.

· Valorar a calidade do informe radiolóxico e non só o tempo empregado en facelo.

· Elaboración de guías clínicas que faciliten o proceso radiolóxico.

· Promover proxectos de investigación a pé de máquina que permitan o avance científico e mellorar a atención ao paciente.

·  E moitas máis…

A día de hoxe (ou de xa hai anos) os servizos de diagnóstico por imaxe non se organizan en base ao uso dunha determinada tecnoloxía, senón por órganos e sistemas, tendo as e os profesionais a posibilidade de aplicar diferentes técnicas diagnósticas sobre o mesmo paciente e poder facer un informe integrado que aporte máis valor para o diagnóstico.

A reactivación dunha Área de Servizo Compartido de Diagnóstico por Imaxe, creada por resolución do 19 de abril de 2002, que non tivera actividade até o de agora, non permitiu dar pasos adiante na integración, xa que non parece que a Consellería de Sanidade, diante das dificultades postas por Galaria, faga valer que Galaria é un medio creado pola propia administración e que debería estar ao seu servizo, e a súa existencia non é un fin en si mesmo, senón que debería estar condicionada á función que desempeña.

Que ten pensado facer a Xerencia da EOXI de Vigo?  O Xerente é o responsable de garantir unha atención de calidade á súa poboación asignada.

Que pensa facer a Consellería de Sanidade? O Conselleiro é o responsable último de manter esta situación, unha completa anomalía na sanidade pública galega, que, unha vez máis, é tolerada en Vigo.

CIG-Saúde reclama a integración total, non so funcional, da Resonancia Magnética, xestionada por Galaria, na EOXI de Vigo, e esixe que isto se faga respectando os dereitos do conxunto das e dos profesionais, tanto de GALARIA como da EOXI de Vigo, pero os intereses derivados da actual estrutura organizativa e laboral de GALARIA non pode antepoñerse aos intereses das e dos doentes atendidos na nosa área sanitaria.

Vigo, 6 de xuño de 2018

Manuel González Moreira

Secretario Comarcal CIG-Saúde Vigo