20 de abr. de 2017

A GUARDA

A Deputación de Pontevedra impulsa o certificado de calidade SICTED entre o sector turístico de A Guarda 

Superan as 50 novas empresas que pediron a súa inclusión no selo de calidade turística dende o inicio da campaña 

Sesión informativa sobor do certificado de calidade SICTED
Foto: D.P.

Infogauda / A Guarda

 A Deputación de Pontevedra impulsa ao longo deste ano un plan de asesoramento gratuíto entre as empresas turísticas da provincia para implantar o certificado de calidade SICTED. O deputado de Turismo, Santos Héctor Rodríguez Díaz, subliñou hoxe nunha sesión informativa sobre o proxecto, que se celebrou na Casa dos Alonso, de A Guarda, que xa son máis de 50 as empresas de toda a provincia que teñen solicitado a súa inclusión no certificado de calidade turística dende que se comezou a campaña. Santos Héctor estivo acompañado na presentación polo alcalde de A Guarda, Antonio Lomba Baz; a deputada provincial e concelleira de Turismo, María Montserrat Magallanes Álvarez e por Tania Abalde da consultora que implanta o SICTED.  

 Segundo destacou Santos Héctor "queremos converter esta comarca nun referente  como destino turístico e implantar sistemas que certifiquen a calidade dos nosos establecementos e servizos turísticos suporá dar un plus de excelencia para unha localidade tan turística como A Guarda".  

 O deputado de Turismo destacou que neste intre existen 203 empresas na provincia que contan co certificado SICTED e que a previsión é que este ano se incremente a cifra ate case acadar as trescentas empresas. De feito, Santos Héctor subliñou que nestes primeiros encontros co sector a demanda dos interesados está sendo moi importante achegándose a máis de 50 empresas que solicitaron a súa inclusión no SICTED.  

 Tania Abalde, responsable da empresa consultora que vai implantar a certificación, insistiu en que a metodoloxía e os requisitos son esixidos pola Secretaría de Turismo do goberno de España, que é quen finalmente outorga a distinción.  

 Para poder optar á certificación, as empresas deben estar englobadas nalgún dos 32 oficios que identifica o SICTED, que son  praias; bares e cafeterías; axencias de viaxe; guías turísticos; seguridade cidadá; comercios; cámpings; adegas; portos deportivos; palacios de congresos; hoteis e apartamentos; turismo industrial; servizos de limpeza; taxis; albergues; convention bureaux; outros servizos; aloxamentos rurais; artesáns; atraque de cruceiros e ferries; servizos turísticos de saúde; empresas de transporte turístico; estacións de esquí e montaña; espazos naturais protexidos; oficinas de información turística; museos e centros de interese turístico; empresas de turismo activo; escolas de español para estranxeiros; aluguer de vehículos e embarcacións de recreo; campos de golf e campos de pitch&putt; restaurantes e empresas turísticas de catering. 

 As empresas terán ate o próximo día 14 de setembro para adherirse ao proxecto. Posteriormente, abrirase un proceso de formación e asesoramento individual a cada empresa para concluír coa avaliación final. Por último, será Turismo Rías Baixas quen valora as propostas que finalmente obteñan a certificación .

Ningún comentario:

Publicar un comentario