PATRIMONIO

Sobre Poliorcética 

 JOSE  BUIZA  BADAS

 A Poliorcética é a arte de atacar e defender as praças militares. Existiu desde há muito tempo e pode-se falar dumha poliorcética castreja cá no Minho, dumha outra grega ou romana, a neurobalística medieva ou da pirobalística moderna e contemporânea. Todavia, a relativa aos mísseis e foguetes para chegarmos a poliorcética de dissuasom, a nuclear. Desde o ceu dispomos de mecanismos ligados à guerra apartir dos satélites. O termo poliorcese prende-se do feito de vivermos em constante atitude de defesa e de ataque. Na nossa vida aparecem momentos difíceis que nos apanham desprevenidos, desacautelados, e lamentamo-nos maldizendo a famosa frase de “A desgraça nom marca encontro”… Poliorcética liga-se por isso mesmo a umha adopçom de medidas intuitivas perante um cenário que nom conhecemos ou um entorno hostil. Daí que, se dermos facilitismos a umha situaçom ameaçante seriamos nós os únicos a perder. 

Plano de Fort Pitt

 No mundo que corre a Diplomacia é poliorcética imprescindível; poliorcética som também as Relaçons de trabalho e produçom, com os protocolos entre patronato e sindicatos. Por isso, nom convém ponher de parte tal vocábulo ou dizer que é algo raro e de sabichons. Há tentativas nestes momentos de tirar-lhe conteúdos à gestom patrimonial ligada à arquitectura militar; pretende-se sem sucesso “civilizar” ou “suavizar” feitos históricos com a introduçom de versons descambadas e adaptadas aos fenómenos interpretativos de esquerda, que nom conseguem senom distorcer os tais eventos neutrais e assépticos. Sem embargo, sendo isto de salientar, na Comunidade Valenciana o grupo Compromís pede proteçom para a linha de bunkers sediada ao longo da costa, determinada por umha funçom defensiva aquando o conflicto civil de 1936-39. Em Madrid, solicita-se um elenco e salvaguarda doutros blockaus em betom para a defesa da serra madrilenha, na mesma contenda. Nas Canarias, em Asturias, etc.. 

 Talvez, na origem disto todo esteja um pensamento homologador, de lugares comuns, de nivelaçom, a que nos querem acostumar. Talvez, a poliorcética seja a prova dada de que a humanidade só conseguiu desenvolvimento e avanço em todos os campos abase do ArsBelli, do princípio de que o homem provavelmente nom tenha remédio. Contudo, estuda-se, pesquisa-se da parte de curiosos ou profissionais dum jeito neutro, sem aderências ideológicas, todo aquilo que tem umha componente universal, internacional, deduzindo-se que a poliorcética seria a primeira globalizaçom havida no mundo conhecido.