A GUARDA

IGREXA DE SANTA MARÍA DA GUARDA,  DO INVESTIGADOR E XORNALISTA ANTÓN FERREIRA LORENZO,  SUBLIME ACHEGA  AO COÑECEMENTO PATRIMONIAL ECLESIÁSTICO GUARDÉS

• O libro - editado por ANABAM - foi presentado na Casa dos Alonso

Joaquín Miguel Villa Álvarez e Antón Ferreira Lorenzo nun momento da presentación

Fotos: Infogauda

Ese era o aspecto que presentaba o salón do plenos do Concello de A Guarda, no acto de onte

Ricardo Rodríguez Vicente / A Guarda

 Tras varios anos de pescuda en diferentes arquivos, imprescindible para poder recompilar os datos históricos necesarios para armar un traballo digno que contribúa ao coñecemento e a divulgación do patrimonio eclesiástico da igrexa matriz guardesa; na tardiña de onte, venres 26 de abril de 2024, no salón de plenos do Concello de A Guarda, tivo lugar o acto de presentación do libro Igrexa de Santa María da Guarda, da autoría do dilixente investigador e xornalista guardés Antón Ferreira Lorenzo, e que vén de editar a Asociación Naturalista "Baixo Miño" (ANABAM), contando cunha subvención parcial do Concello de A Guarda.

 O acto, que foi seguido por unha representación da cidadanía de O Rosal, Oia, Tomiño e A Guarda, contou, en primeiro lugar, coa participación do profesor e historiador guardés Joaquín Miguel Villa Álvarez. 

Portada do libro Igrexa de Santa María da Guarda, de Antón Ferreira Lorenzo

 Na súa intervención, Villa Álvarez, debullou algunhas das características (100 páxinas, abundancia de imaxes a cor,...), da publicación que o autor doou a ANABAM, de tal xeito que o importe que se recade coa venda do libro irá para esa asociación conservacionista, da cal Antón Ferreira é membro fundador e activo colaborador.

 Villa Álvarez, doutor en Historia Contemporánea pola Universidade de Santiago de Compostela, referíuse tamén ao contido do libro (apuntamentos históricos da igrexa, percorrido histórico artístico da mesma,...), e mencionou o interese dos datos referidos as listaxes de párrocos e sancristáns.

 Con todo, Villa Álvarez anotou que como precedente a este novo libro de Antón Ferreira Lorenzo, vemos «La Iglesia de La Guardia», da autoría do cóengo Juan Domínguez Fontela, que en 1929 publicou o semanario local La Voz del Tecla.

 Villa Álvarez, mencionou a bibliografía da autoría de Antón Ferreira Lorenzo (As marcas dos mariñeiros da Guarda (1995); Guía del monte de Santa Trega y su museo (en unión de Luis Dorado Senra) (1998, 2ª ed.); Guía didáctica do monte Santa Trega; Útiles e aparellos do Museo do Mar da Guarda; amén dun libro poemario titulado: Ondas do noso mar), toda ela editada por ANABAM.

 De xeito, obviamente moi breve, o interviniente tamén mencionou a sinatura de Antón Ferreira Lorenzo en infinidade de artigos en diferentes publicacións.   

 Respecto a súa presenza, nese acto  Villa Álvarez dixo: "A razón de estar eu aquí, porque no libro non axudei en nada, é por amizade".

 Tamén destacou de Antón Ferreira Lorenzo "Tres facetas (as tres As):  

 Amante da Guarda (natureza, cultura, historia, patrimonio, etc.). 

 Altruísta (bo e xeneroso). 

 Autodidacta (traballo de campo e lecturas)".  

 Na descrición do perfil do autor salientou súa participación en asociacións: 

 Agrupación Cultural Guardesa. Membro fundador e secretario varios anos, e un dos encargados da sección de patrimonio;  Asociación Naturalista "Baixo Miño" (ANABAM). Socio fundador, colaborador, textos, fotografías, saídas de campo...; Sociedade Filatélica e Numismática Guardesa. Socio colaborador e promotor do seu famoso Boletín Informativo.   

 A continuación Villa Álvarez mencionou á faceta de Antón Ferreira Lorenzo como xornalista (correspondente), tanto nas ondas radiofónicas (Radio Galega e Radio Municipal de Tui); na prensa escrita (A Peneira e Atlántico Diario - dende o nº 0 -, onde segue); i en Internet (Galiciasuroeste. 1ª páxina web de información xeral da Guarda), ao longo duns quince anos: 2000-2013).

 Xa no tramo final da súa intervención, Joaquín Miguel Villa Álvarez dixo que Antón Ferreira Lorenzo é un dos promotores do Camiño Portugués pola Costa e 1º Hospitaleiro Voluntario (A fronte do albergue da Guarda, día e noite), e que fixo 23 camiños xacobeos.   

 Como colofón a súa intervención sobre Antón Ferreira Lorenzo, citou a Miguel de Cervantes, e dixo: «Quien anda mucho y lee mucho, ve mucho y sabe mucho». 

 As verbas pronunciadas por Joaquín Miguel Villa Álvarez foron premiadas cos aprausos dos asistentes.

 A continuación sería Antón Ferreira Lorenzo, quen ademais de agradecerlle a Villa Álvarez súa intervención, fixo un percorrido histórico - con apoio de imaxes fotográficas - pola cronoloxía da igrexa parroquial de Santa María de A Guarda, patróns e benfeitores; súa arquitectura e bens patrimoniais,...; descubrindo - como xa o fixera o sábado 27 de maio de 2023, na visita guiada realizada in situ, tanto no exterior como no interior do templo parroquial guardés -, pormenores que sen seu labor de investigación pasan inadvertidos para a práctica totalidade das persoas.

 Logo da presentación do libro, foron postos á venda exemplares do mesmo, que o autor asinoulles aos asistentes alí presentes que llo solicitaron.

 Todas as persoas que desexen adquirir esta interesante publicación, poderán facelo nos vindeiros días nas librerías da localidade.