PONTEVEDRA

O goberno de Carmela Silva decide retomar os traballos de escavación no campo da Lanzada 

A presidenta asegura que "se trata dunha decisión seria e de respecto ao patrimonio, fronte á irresponsabilidade de Fomento" 

Carmela Silva, presidenta da Deputación de Pontevedra

Foto: D.P.

Infogauda / Pontevedra

 O equipo de arqueoloxía da Deputación de Pontevedra retomou hoxe os traballos de escavación no xacemento da Lanzada para cumprir co proxecto establecido no Protocolo co Ministerio de Fomento. O goberno de Carmela Silva decidiu así completar o programa no castro de Noalla, á vez que xa encargou a redacción do proxecto de consolidación definitiva que, se Fomento non asume, levará a cabo cando terminen as escavacións. "Trátase dunha decisión responsable e coherente coa nosa aposta polo respecto ao patrimonio ante a desidia do Ministerio", dixo a Presidenta. "Aínda así, espero - engadiu Carmela Silva - que en Madrid reaccionen e decidan cumprir coas súas obrigacións".  

 Ata este luns, os operarios da Deputación estiveron realizando os labores de limpeza e conservación preventiva nos castros do Trega, (A Guarda), e Alobre, (Vilagarcía), traballos necesarios antes da consolidación definitiva, cuxos proxectos se están terminando de redactar. Desde media mañá os arqueólogos incorporáronse aos traballos na Lanzada onde seguirán ata cumprir co proxecto autorizado por Patrimonio da Xunta, evitar o risco de deterioración que a inacción de Fomento pode causar, e ante os importantes achados que o xacemento está a revelar.  

 O goberno provincial volve a facer un chamamento ao Ministerio de Fomento para que "dunha vez fixe unhas datas realistas que non comprometan a existencia do proxecto e cumpra coas súas obrigacións, claramente delimitadas no Protocolo". Así mesmo, a Deputación de Pontevedra reclamará todos aqueles gastos que teña que afrontar a institución provincial por realizar os traballos que corresponden ao Ministerio.