PONTEVEDRA

A iniciativa Running Rías Baixas incluirá tres carreiras populares en Tui, Moraña, O Grove e Cambados

A DEPUTACIÓN APOSTA POLO SENDEIRISMO E O RUNNING PARA A PROMOVER HÁBITOS DE VIDA SAUDABLES E DIFUNDIR A RIQUEZA CULTURAL E PAISAXÍSTICA DA PROVINCIA

·       No marco de Sendeiros Rías Baixas organízanse 5 rutas de sendeirismo por espazos nos que se combina a beleza da paisaxe con elementos de valor etnográfico e arqueolóxico

Promover hábitos de vida saudable e contribuír á difusión e posta en valor dos recursos naturais, arqueolóxicos, etnográficos e arquitectónico da provincia é o obxectivo de dúas iniciativas que pon en marcha a Deputación para os meses de maio a outubro.

Trátase dos programas Sendeiros Rías Baixas e Tour Running Rías Baixas, que esta mañá presentaron en rolda de prensa o vicepresidente da Deputación José Manuel Figueroa e a deputada provincial Begoña Estévez, acompañados dos alcaldes de Tui e Cangas, Moisés Rodríguez e José Enrique Sotelo, onde van ter lugar as primeiras probas. No acto tamén participaron os deportistas Anxo Graña e Juan Romero, que colaboran na organización das probas.

 5 andainas

No que respecta a Sendeiros Rías Baixas, consiste na organización de 5 andainas por rutas de sendeirismo nas que se combina natureza con arte, etnografía e patrimonio arqueolóxico.

Non son, tal e como indicou a deputada Begoña Estévez, rutas pensadas para deportistas profesionais, senón para “o público en xeral, para calquera persoa á que lle guste camiñar e disfrutar da paisaxe”.

Serán, pois, andainas de dificultade baixa ou media e de distancias curtas, que se iniciarán o vindeiro 17 de maio en Cangas, co roteiro circular Donón-Monte do Facho, e continuarán ata o mes de setembro con outras 4 rutas: Camiños do Trega en A Guarda; Adro Vello-Con Negro en O Grove; Ruta da Auga, as fontes e os lavadoiros de Parada, en Silleda; e Pontes do Lérez, en Forcarei.

Exceptuando a ruta de Forcarei, que ten unha lonxitude de case 14 quilómetros, as demais sitúanse todas no contorno dos 7 quilómetros.

2.000 persoas

A Deputación agarda que sexan unhas 2.000 persoas as que se sumen a estes percorridos, que incluirán os servizos de guía, atención sanitaria e o agasallo dun poncho para cada participante así como consellos para realizar sendeirismo da forma máis saudable e información turística da zona.

O obxectivo é que, ao tempo que se difunden os beneficios do deporte entre a poboación xeral, se acheguen os recursos propios da provincia a toda a poboación, contribuíndo á súa difusión.

José Enrique Sotelo agradeceu que se incluíse unha ruta no Concello de Cangas e destacou o interese paisaxístico e arqueolóxico do itinerario, que conta co distintivo europeo de Sendeiro Azul (equiparable ao de bandeira azul).

Running Rías Baixas

A estas rutas, e dirixido xa a persoas máis habituadas ao deporte, súmase o programa Running Rías Baixas, que consistirá na  organización de tres carreiras populares en catro concellos da provincia.

A primeira delas será a Eurocidade 10, que se celebrará o vindeiro 8 de xuño no concello de Tui, cun percorrido de 10 quilómetros. Tal e como indicou o alcalde da localidade, Moisés Rodríguez, trátase dunha carreira que debe o seu nome á unión da localidade pontevedresa coa veciña de Valença, por onde tamén discorrerá a proba. “Con esta marcha a Deputación traspasa fronteiras”, asegurou, antes de augurar un gran éxito para esta proba que xa na edición do pasado ano acadou os 600 participantes.

O rexedor local indicou que agarda que este ano a participación “chegue aos 1.000 corredores, grazas ao efecto multiplicador” que ten a súa inclusión nun circuíto da Deputación.

A segunda das carreiras que se integrará nesta iniciativa é a Carreira do Carneiro ao Espeto, que se desenvolverá o 20 de xullo no concello de Moraña, cun percorrido de 8 quilómetros e como parte dos actos dunha das festas gastronómicas máis relevantes e concorrida da provincia.

Finalmente, o circuíto pecharao unha carreira que ata o de agora non figuraba no calendario de actos dos concellos: unha media maratón (21 quilómetros) entre os concellos de O Grove e Cambados que se disputará no mes de setembro.

Esta iniciativa, segundo afirmou Anxo Graña, supón unha “iniciativa novidosa”, ao crear un circuíto de carreiras populares no que a clasificación non se fai de forma individual para cada unha, senón que se establece un sistema de clasificación no que se terá en conta a participación e o resultado das tres probas. Será o mesmo formato que se usa para as clasificacións xerais dunha volta ciclista, sumando os tempos de cada unha das probas.

A inscrición será gratuíta tanto para participar en Sendeiros Rías Baixas como no Tour Running e poderá facerse a través da web da Deputación ou nos propios concellos.

  

DETALLE DAS RUTAS DE SENDEIROS RÍAS BAIXAS

17 de maio: (Cangas) Donón-Monte do Facho. 7,1 quilómetros. 3 horas de duración. Dificultade baixa.

- Punto de partida e chegada: Mirador da Costa da Vela.

- Detalles: Transcorre no espazo natural Monte Facho e combina a riqueza arqueolóxica deste contorno (onde se atoparon xa 174 aras e no que se sitúa o santuario máis antigo de Galicia) coa espectacularidade da paisaxe (con fermosísimas vistas das rías Pontevedra, Vigo e Arousa, así como das Cíes e Ons)

1 de xuño: (A Guarda) Camiños do Trega. 7,7 km. Dificultade Media. 2 horas

- Punto de partida e chegada: Mirador de Areses

- Detalles: É un conxunto de pequenos carreiros que ascenden polas ladeiras do Monte ata a Ermida de Santa Trega, onde se pode disfrutar deste peculiar xacemento e das panorámicas que desde o monte de observan.

14 de setembro: (O Grove) Adro Vello-Con Negro. Combina dúas rutas de dificultade baixa e cunha lonxitude total de 6,3 km. Duración: 2 horas e media.

- Detalles: En Adro Vello atópase un xacemento arqueolóxico de gran relevancia e a escasos metros do mar… En Con Negro as rutas percorren as praias de Con Negro, Aguieira, Barreiro e Castiñeira.

12 de outubro: (Silleda) Ruta da Auga, fontes e lavadoiros de Parada. 6,7 k. Dificultade baixa. 2 horas

- Punto de partida-chegada: Fonte de Os Buxos

- Detalles: Ruta que combina etnografía (con fontes e lavadoiros restaurados) con natureza, pasando por contornos cheos de carballos, castiñeiros e bidueiros, e a carón de numerosos regatos.

1 de novembro: (Forcarei) Pontes do Lérez. 13,8 km. Dificultade Media. 4 horas e media.

-  Punto de partida-chegada: Mosteiro de Aciveiro

- Detalles: Combina arquitectura tradicional e paisaxe. Partindo do mosteiro de Aciveiro, cruza numerosas pontes sobre o Lérez, entre elas a ponte medieval de Gomail.