TOMIÑO

JORQUERA PIDE A RAJOY QUE DEIXE OS ACTOS ELECTORALISTAS E DEA A CARA E EXPLIQUE OS BRUTAIS RECORTES QUE TEN PREVISTO APLICAR

Francisco Jorquera na súa participación na festa nacionalista de Tomiño, xunto á alcaldesa do concello, Sandra González, e a deputada Carme Adan.

Jorquera na Fortaleza de Goian, na Festa Nacionalista do BNG do Baixo Miño
Fotografía: Alberte Alonso Pereira

O candidato nacionalista á presidencia da Xunta lamenta a imaxe de subordinación do poder civil ao eclesiástico ofrecida hoxe por Rajoy coa entrega do Códice Calixtino

Infogauda / Tomiño 

O candidato do BNG á presidencia da Xunta, Francisco Jorquera, esixiu hoxe a Rajoy que dea a cara para explicar os “drásticos” e “brutais” recortes que pensa aplicar en vez de asistir a Santiago ao acto de entrega do Códice, “un acto electoralista máis propio de tempos pretéritos, de subordinación do poder civil ao relixioso”.

Jorquera, que asistiu a Tomiño á súa tradicional Festa Nacionalista, advertiu que as medidas que o goberno central está pondo sobre a mesa van conlevar que a recesión se agrave e se transforme nunha grande depresión económica que empobrecerá aínda máis ás clases medias e expulsará do sistema a parte da poboación.

Para o candidato nacionalista, estas medidas que Rajoy non se atreve a explicitar demostran que a o estado español é un estado intervido a efectos prácticos, pois se van aplicar as mesmas medidas e recetas que se adoptaron, por exemplo, en Grecia, e que conduciron a este País á situación de derrumbe na que se atopa, “unha situación insostíbel para a súa sociedade”.

“Visto isto -engadiu- é necesario un cambio de rumbo nas políticas públicas, para que as persoas estean por riba dos dictados dos mercados, das esixencias dos grandes poderes económicos”.

Neste sentido, Jorquera apelou á que se lle dea voz aos cidadáns, que teñan dereito a opinar a través dun referendum tanto polos recortes como polo feito de que Rajoy foi incumprindo todos e cada un dos seus compromisos, pois ningunha das medidas que está a adoptar está incluida no seu programa.

O candidato nacionalista aproveitou a súa visita á Fortaleza de Goián, unha actuación do concello de Tomiño, gobernado polo BNG por maioría absoluta,  que se acaba de inaugurar recientemente para demostrar como é posíbel pór en valor o patrimonio galego.

“Esta acuación exemplar -dixo- contrasta coa deixadez do goberno da Xunta na asunción das súas competencias, á hora de garantir a seguranza dos bens patrimoniaias galegas, nomeadamente pezas como o Códice”.

Jorquera lamentou actos como o celebrados hoxe en Santiago, de entrega do Códice por parte de Rajoy, que, na súa opinión, son máis propios de tempos pretéritos que de tempos democráticos.

“A imaxe de hoxe foi una imaxe de subordinación do poder civil ao poder relixioso”, dixo, ao tempo que pediu que se abra expediente á Igrexa polo acontecido co Códice e se tomen as medidas necesarias para que a custodia deste tipo de obras depende dos poderes públicos, que aseguren o seu coidado e o seu acceso ás visitas e aos historiadores.