TOMIÑO

A plataforma Queremos Galego do Baixo-Miño envía 1000 postais ao Presidente da Xunta para que en 2010 tamén el queira galego

Representantes das diversas entidades que conforman a plataforma na comarca do Baixo-Miño concentráronse na mañá de hoxe na oficina de correos de Tomiño

Plataforma Queremos Galego / Baixo Miño

En tan so dez días a plataforma Queremos Galego do Baixo-Miño recolleu máis de 1000 postais asinadas por outras tantas persoas que no día de hoxe representantes das asociacións e organizacións que conforman a plataforma entregaron na oficina de correos de Tomiño. Segundo expresou o músico guardés Tino Baz, portavoz de Queremos Galego no Baixo-Miño “con este acto pretendemos estender a inmensa marea social en defensa do noso idioma e obrigar ao presidente cando menos a que escoite o sentir dunha ampla maioría social en defensa do idioma de todas e todos”.

Promovendo este envío masivo de postais - engadiu Tino Baz - Queremos Galego quérelle achegar ao titular do goberno galego os bos desexos da inmensa maioría do noso pobo para que no ano 2010 “el tamén queira galego” e, en consecuencia, modifique de vez a súa política lingüística causante de división, crispación e enfrontamento.

A plataforma aproveitou o acto para anunciar que nos próximos días distribuirá por toda a comarca tamén de xeito masivo adhesivos para pór no automóbil e bandeirolas co lema QUEREMOS GALEGO, animando á súa exhibición en fiestras, balcóns, comercios, centros de traballo e todo tipo de espazos onde se poida visualizar “que o pobo galego quere a súa lingua propia”.