A GUARDA

AS PRAIAS AREA GRANDE E O FORTE (CAMPOSANCOS) IZAN UN ANO MÁIS AS BANDEIRAS AZUIS 

• O distintivo recoñece a calidade ambiental, a seguridade e os servizos destes dous areais, que xa contan tamén co servizo de socorrismo para a tempada estival 

A entrega oficial das bandeiras azuis tivo lugar da man do delegado territorial da Xunta de Galicia en Pontevedra, Pablo Fernández, quen cedeu estes distintivos ao alcalde da Guarda, Roberto José Álvarez Carrero, e aos concelleiros Óscar Alonso Álvarez e Isidro Lomba Lorenzo

Fotos:CAG

Infogauda/A Guarda

 As praias da Area Grande e O Forte (Camposancos) xa teñen izada a bandeira azul, un distintivo concedido pola Asociación de Educación Ambiental e do Consumidor (ADEAC) que acredita o cumprimento dos máis altos estándares de calidade das augas, xestión ambiental, seguridade, accesibilidade e servizos. 

 Este recoñecemento volve poñer en valor dous dos principais areais do municipio, que destacan tanto pola súa riqueza natural como pola súa contorna privilexiada. A Area Grande, aberta ao océano Atlántico, e O Forte (Camposancos), situada na desembocadura do río Miño, constitúen dous espazos de referencia para veciñanza e visitantes durante a época estival. 

 A entrega oficial das bandeiras azuis tivo lugar da man do delegado territorial da Xunta de Galicia en Pontevedra, Pablo Fernández, quen cedeu estes distintivos ao alcalde da Guarda, Roberto José Álvarez Carrero, e aos concelleiros Óscar Alonso Álvarez e Isidro Lomba Lorenzo, poñendo en valor o compromiso dos concellos galegos coa calidade ambiental, a seguridade e a excelencia dos seus areais. 

 Dende hoxe, 2 de xullo, ambas praias contan ademais co servizo de socorrismo, que permanecerá operativo ata comezos do mes de setembro. O dispositivo está integrado por seis socorristas, garantindo a vixilancia diaria entre ás 12:00 e ás 20:00 horas, nas dúas praias.