Chámome Julia. a historia máis persoal de Julia Vaquero
• A novela de Isidoro Hornillos, editada pola Federación Galega de Atletismo e baseada en feitos reais, revela a historia persoal e deportiva da atleta, marcada polos éxitos internacionais, os trastornos alimentarios, a enfermidade mental e a súa loita por volver empezar
A publicación constitúe a primeira ocasión na que Julia Vaquero decide compartir de maneira íntegra a súa historia persoal e deportiva, dando a coñecer episodios que ata o de agora permanecían practicamente descoñecidos para o gran público.
Durante máis de tres décadas, a sociedade coñeceu a atleta que competía coas mellores corredoras do panorama internacional. Porén, detrás da deportista de elite existía unha historia marcada por unha infancia difícil, a inseguridade, a presión da alta competición, a loita contra un trastorno da conduta alimentaria e, anos despois da súa retirada, o difícil proceso de afrontar unha grave enfermidade mental.
Partindo dun exhaustivo traballo de documentación e das numerosas conversas mantidas entre o autor e a propia protagonista, Chámome Julia combina o rigor dos feitos coa forza da narrativa para ofrecer un relato de superación, memoria e reconstrución persoal.
A obra transcende o ámbito estritamente deportivo para abordar cuestións de plena actualidade como a saúde mental, a autoestima, a violencia psicolóxica, a maternidade, o fracaso, a esperanza e a capacidade das persoas para reconstruír a súa vida despois das situacións máis adversas.
Segundo explica o autor, o libro nace da vontade de preservar unha historia de enorme valor humano e deportivo, pero tamén do compromiso de dar voz a unha realidade que continúa sendo difícil de expresar. Pola súa banda, Julia Vaquero decidiu abrir por primeira vez os capítulos máis duros da súa vida convencida de que o seu testemuño pode contribuír a axudar outras persoas que atravesen circunstancias semellantes.
Chámome Julia estará dispoñible en Amazon a partir de mediados do mes de xullo.
Ningún comentario:
Publicar un comentario