A GUARDA

A ROSEGHA DEMOSTRA QUE O MAR NON ENTENDE DE MODAS E ENGANCHA A NENOS E MAIORES POR IGUAL 

•  Centos de persoas pasaron durante a fin de semana pola carpa do festival, onde se esgotaron os kits infantís dos obradoiros e as prazas para navegar no volanteiro Piueiro e a piscina de navegación rexistrou un cheo absoluto en todas as quendas 

•  A Asociación Piueiro fai unha valoración sobresaliente, agradece o traballo do voluntariado e o apoio do Concello da Guarda e da Deputación de Pontevedra e xa pensa na cuarta edición, coa vontade de seguir medrando sen perder o carácter familiar da cita 

Unha gamela á vela dirixíndose á bocana do porto da Guarda

Fermosa estampa na mañá deste domingo no porto da Guarda

Mar Bermúdez/A Guarda

 A terceira edición de A Rosegha rematou como rematan as citas que funcionan: sen xogos para os nenos, sen prazas libres no volanteiro e sen un oco arredor da piscina de navegación. Centos de persoas pasaron entre o sábado e o domingo pola carpa do porto da Guarda, na edición máis concorrida das tres celebradas ata agora pola Asociación Piueiro. 

 Os números do festival contan a historia sós. Os xogos infantís dos obradoiros de návoas e arxila esgotáronse antes do previsto, coas mesas cheas de rapazada en todas as sesións. As prazas para navegar no volanteiro Piueiro, a embarcación tradicional recuperada pola asociación, quedaron completas en todas as quendas do sábado e do domingo. E a piscina de navegación rexistrou un cheo absoluto de mañá a noite, coa navegación nocturna do sábado mantendo público na carpa pasada a medianoite. As charlas e presentacións de libros, coa vela latina, os barcos de vapor e a Nao cetácea como protagonistas, achegaron ademais un público que non sempre se acerca ao modelismo.

 

A piscina de navegación rexistrou un cheo absoluto de mañá a noite

 Desde a Asociación Piueiro subliñan que o máis valioso non son os números, senón quen está detrás deles: veciños de todas as idades, modelistas chegados doutros puntos de Galicia e de Portugal e familias que fixeron do porto o seu plan de fin de semana. Houbo sitio para quen leva décadas construíndo barcos a escala e para quen botou á auga a súa primeira návoa. 

 O colectivo agradece a implicación do voluntariado, que sostivo a programación durante toda a fin de semana, así como a resposta da veciñanza e o apoio do Concello da Guarda e da Deputación de Pontevedra, imprescindibles para levantar unha cita destas dimensións. 

 Coa terceira edición pechada, a organización xa mira á de 2027. O reto, apuntan, non é medrar por medrar, senón seguir facendo compatible a dimensión que vai collendo o festival co seu carácter familiar e participativo. Se algo demostrou esta fin de semana é que na Guarda a memoria do mar non se garda nunha vitrina: bótase á auga.