O ROSAL

O humor cruza a raia para contar as historias que non saíron nos libros   

• Chirlomirlo Teatro chega ao auditorio do Rosal con Arraiadas, unha comedia baseada en feitos reais da posguerra no Baixo Miño. Domingo 18 ás 19.00 horas, de balde  

Infogauda / O Rosal 

 Ás veces a historia non se aprende nos manuais, senón nas historias pequenas, nas que se contaban ao pé do lume e nas que o humor servía para facer máis levadeira a dureza da vida. Esa memoria colectiva, marcada pola necesidade, a picaresca e a supervivencia, sobe ao escenario este domingo 18 de xaneiro ás 19.00 horas no Auditorio Municipal do Rosal coa representación de Arraiadas, de Chirlomirlo Teatro. 

 A obra é un compendio de relatos fronteirizos ambientados na posguerra, cun fío condutor claro: o trapicheo que as xentes humildes do Baixo Miño realizaban para saír adiante. Historias absolutamente reais, recollidas da tradición oral e do arquivo da memoria popular, que Chirlomirlo Teatro transforma nunha comedia intelixente e directa, pasada pola peneira do seu humor característico. Unha proposta que demostra que a realidade, ben contada, pode ser máis sorprendente ca calquera serie de ficción. 

 Para garantir o rigor histórico das historias que sustentan a obra, Arraiadas contou co asesoramento da historiadora tomiñesa Natalia Jorge, referente internacional no estudo da raia, que colaborou na documentación e contextualización dos feitos narrados sobre o escenario. 

 A alcaldesa do Rosal, Ánxela Fernández Callís, destacou o valor cultural e social da proposta, sinalando que “Arraiadas permítenos mirar ao pasado desde o humor e a reflexión, poñendo en valor unha memoria colectiva que forma parte da nosa identidade como territorio de fronteira. Poñer en valor o traballo de compañías teatrais como Chirlomirlo Teatro é apostar por unha cultura que conecta coa xente, que emociona e que fai pensar, ao tempo que recupera historias que non deben caer no esquecemento”. 

 A representación, de balde e aberta ao público, forma parte da programación cultural de inicio de ano do Concello do Rosal, cunha clara aposta por achegar ao auditorio propostas de calidade, con identidade propia e vencelladas á historia e á memoria do territorio.