O ROSAL

O Rosal convértese nun laboratorio sonoro coa nova edición das Xornadas Instrumentais da Eurocidade  

• Clases Maxistrais gratuítas con mestras e mestres de primeiro nivel abrirán o auditorio municipal a alumnado, residentes e bandas da futura Eurocidade da Foz do Miño  

Infogauda / O Rosal 

 A música desprázase neste final de ano polo Rosal como unha corrente viva, capaz de unir xeracións, territorios e escolas nun mesmo pulso creativo. Así arranca a segunda edición das Xornadas Instrumentais Eurocidade, un ciclo formativo que traerá ao auditorio municipal profesorado de prestixio internacional para impartir clases maxistrais gratuítas a residentes, alumnado e membros das agrupacións musicais de O Rosal, A Guarda e Caminha. 

 Organizadas polo Concello do Rosal e pola Agrupación Musical do Rosal, as xornadas celebraranse entre novembro e decembro no Auditorio Municipal, cun formato intensivo de mañá e tarde de 10.00 a 14.00 h e de 16.00 a 20.00 h. A inscrición xa está aberta a través dun formulario en liña e pódese solicitar máis información por WhatsApp no teléfono 609 866 792. 

 A alcaldesa do Rosal, Ánxela Fernández Callís, subliñou que “esta iniciativa coloca ao noso concello no mapa da formación musical de alto nivel, ofrecendo oportunidades que normalmente só están ao alcance das grandes cidades”. A rexedora engadiu tamén que “a Eurocidade da Foz do Miño comeza a sentirse nos pequenos grandes proxectos: aquí a música é a ponte, o encontro e o impulso para que a mocidade e o talento local sigan medrando. Durante estas semanas o noso auditorio convértese nun espazo vibrante, aberto e creativo e queremos que todas as persoas interesadas sintan que este é tamén o seu escenario”. 

Un elenco docente excepcional 

 A programación contará cun cartel de profesorado que abrangue desde a música clásica á tradicional, pasando pola técnica vocal, a percusión ou a dirección de banda. Entre as e os docentes convidados están Noa Granja (violonchelo), membro de orquestras como a Orquestra Sinfónica de Galicia, a Orquestra Gaos ou a Vigo 430 e formada con profesorado de referencia como Héctor Santos, Ruslana Prokopenko ou Raúl Mirás; Óscar Araújo, catedrático de fagot no Conservatorio Superior de Música de Vigo con formación internacional a través de Erasmus Staff Training en centros de Basilea, Múnic, Bruxelas e Ámsterdam; Suso Vaamonde (música tradicional), director da Escola de Instrumentos Populares Galegos de Caldas de Reis e autor de máis de 40 pezas e arranxos; Alba Rodríguez (percusión), formada na ESMUC e no Conservatorium of Maastricht, cunha sólida traxectoria europea e colaboradora habitual de orquestras como a Euskadiko Orkestra e a Bilbao Orkestra Sinfonikoa; Óscar Vázquez (trombón), trombón baixo principal da Orquestra Sinfónica de Galicia e colaborador da ONE, da Orquestra de Navarra e da Sinfónica de Castilla y León, entre outras; Isidro Betancourt (técnica vocal e coro), director de corais de Galicia e Portugal e fundador de Insieme, agrupación internacional con máis de 100 músicos, cantou na catedral de San Pedro do Vaticano e participou na Schola Cantorum Coralina, recoñecida internacionalmente; Javier Alonso (banda e dirección), director titular da Agrupación Musical do Rosal, premio do “Certamen de Música de Cámara Centenario Jesús de Monasterio” e fundador do Trío Primo Tempo. 

Formación aberta á Eurocidade 

 Poderán participar gratuitamente persoas residentes na futura Eurocidade da Foz do Miño, alumnado de centros musicais da Guarda, do Rosal e de Caminha, así como membros das bandas e escolas musicais das tres vilas, incluíndo o Conservatorio Elemental de Música de A Guarda, a Agrupación Musical de A Guarda, a Escola e Conservatorio Profesional da Agrupación Musical do Rosal, a Academia Fernándes Fão e a Sociedade Musical Banda Lanhelense.