TOMIÑO

Un novo capítulo para o coñecemento: A Aula Estudo de Tomiño despídese para dar paso ao Espazo Isaura Gómez   

•  Con máis de 540 chaves de acceso entregadas, este espazo de encontro pecha unha etapa chea de éxito e servizo á veciñanza local  

A Aula Estudo de Tomiño anuncia o seu peche definitivo o próximo luns 4 de agosto

Foto: C.T.

Infogauda / Tomiño 

 A Aula Estudo de Tomiño, un espazo que dende a súa apertura en 2020 se converteu nun piar fundamental para a infancia e a xuventude do municipio, anuncia o seu peche definitivo o próximo luns 4 de agosto. Con todo, esta despedida non significa un adeus, senón o inicio dunha nova etapa chea de ilusión, coa próxima apertura do Espazo Isaura Gómez. 

 Inaugurada en plena pandemia, nun momento no que o acceso a espazos seguros para o estudo era máis necesario ca nunca, a Aula Estudo naceu co obxectivo de ofrecer un lugar amplo, cómodo e equipado con internet, pensado especialmente para quen non contaba con estas facilidades nos seus fogares. 

 Este espazo, deseñado polos arquitectos Xavier Pousa e Lara Leal, soubo transformar un antigo cine nun moderno espazo destinado ao aprendizaxe. Ademais, a artista Pilar Alonso achegou un valor simbólico único coa súa obra “Súbelo a la nube”, realizada con follas de libros doados polos veciños, que representaba a transición do coñecemento físico ao dixital. 

 Durante estes cinco anos entregáronse máis de 540 chaves de acceso, unha cifra que reflicte o compromiso e a enerxía dunha comunidade que converteu este espazo nun verdadeiro fogar para o seu crecemento persoal e académico. Consciente da importancia deste lugar, o Concello de Tomiño considerou fundamental despedilo con cariño e recoñecemento, organizando unha emotiva foto colectiva de despedida que reuniu usuarios e responsables para celebrar todo o vivido. 

 O peche inminente marca o inicio do traslado ao novo Espazo Isaura Gómez, un proxecto moderno e ambicioso que contará cunha biblioteca municipal actualizada, amplas zonas de estudo e espazos de encontro. Este centro abrirá as súas portas en setembro, inaugurando así un novo lugar de referencia cultural e educativa para a localidade tomiñesa.