A Coruña será o epicentro do cómic en España este verán coa edición 2025 de Viñetas desde o Atlántico
• Do 11 ao 17 de agosto de 2025, a cidade da Coruña acolle a celebración da 28ª edición do Festival Viñetas desde o Atlántico con máis autores, exposicións e novidades que nunca
Infogauda / A Coruña
O festival Viñetas desde o Atlántico regresa na súa edición 2025 cunha programación vibrante e chea de novidades. Este ano, os temas centrais son a relación entre a Banda Deseñada (BD) e a música, que comezou coa exposición ‘Quino na música’, ademais dunha homenaxe especial a Castelao no 75º aniversario do seu falecemento. Con máis de 70 autores nacionais e internacionais, exposicións, concertos, actividades para todos os públicos e un destacado programa gastronómico, o festival reafirma o seu compromiso coa cultura do cómic e a creatividade, situando á Coruña como a capital peninsular do cómic no verán.
O tema central desta edición será a relación entre o cómic e o mundo musical, con exposicións e concertos que unen ambas as disciplinas. Ademais, Viñetas realizará unha homenaxe a Castelao para conmemorar o 75º aniversario do seu falecemento e dedicaranse exposicións e actividades especiais para lembrar o seu legado.
Durante a presentación oficial este venres en María Pita, a alcaldesa da Coruña, Inés Rey, destacou que “este festival é unha proba de que, cando todas as institucións e empresas colaboramos por riba das ideoloxías, a cultura chega máis lonxe e a máis xente”. O director do festival, Manel Cráneo, indicou que se trata dunha edición moi especial do Viñetas porque “teremos un programa moi completo con moitas actividades e liñas moi potentes de acción”. Pola súa banda, o secretario xeral de Cultura da Xunta de Galicia, Anxo Lorenzo, recoñeceu que “a banda deseñada é un xénero con enorme potencial para facer medrar a nosa industria cultural”. En representación da Deputación da Coruña estivo presente na rolda de prensa José Ramón Rioboo Castro, que indicou que “o Viñetas é un dos piares culturais da nosa provincia”.
Nesta edición, participan máis de 70 creadores (73), fronte aos 40 do ano pasado, e preséntanse 20 exposicións, en comparación coas 18 de 2024. E, como non podía ser menos, na Coruña estarán figuras internacionais e nacionais da talla de Dave Cooper; un dos principais ilustradores de Canadá; Magius, premio nacional de Cómic en 202; Fermín Solís, da nova onda do cómic español ou o polifacético artista galego Paco Coyote. Tamén estarán os destacados ilustradores Carlos Azagra, Encarna Revuelta, Miguel B. Núñez, Olivia e Clara Cábez, Don Rogelio J, Inacio e Iván Suárez, Sara Jotabé, Montse Mazorriaga, Marika Vila, Jorge Esteban Urabayen, Sandra Lordi, Laura Suárez, Raquel Gu, Natalia Velarde, Arkaitz González, Diego Burdío e Adrián Prado, entre outros.
EXPOSICIÓNS, CÓMIC E MÚSICA
Ademais, a cidade coruñesa acollerá 20 mostras, incluíndo 'Quino na Música', 'Astro-Ratón y Bombillita' de Fermín Solís na Sala Municipal de Palexco; 'Viñetas y Decibeis', no Quiosco Alfonso e obras de Víctor Coyote, Azagra, Revuelta, Magius, Miguel B. Núñez, Cols (Olivia e Clara Cábez), Don Rogelio J e Wobbly de Dave Cooper, en Cásaa Museo Picasso. Por outra banda, en colaboración coa Deputación dá Coruña, a Sala Municipal de María Pita, acollerá obras de Inacio e Iván Suárez e as gañadoras dos Premios Castelao 2024, Sandra Lordi e Laura Suárez.
Ademais, do 11 ao 17 de agosto a exposición ‘Quino na música’ contará cunha instalación futurista que ofrecerá aos visitantes unha experiencia 3D xunto a Mafalda.
Estas Viñetas 2025 tamén vén cargado de concertos gráficos e actuacións en vivo, incluíndo o concerto ilustrado de Hombre Tigre, actuacións de autoras como Anabel Colazo e Raquel Montero, ademais da proxección do documental 'Quinografía' e un 'Latexa Night Show' con entrevistas a autores, presentado por Neves Rodríguez.
TALLERES E GASTRONOMÍA
Ademais, as Viñetas Mini traerá talleres diarios con autores convidados na Sala Municipal de Palexco e espectáculos nas Bibliotecas Municipais e a tradicional Rúa BD encherá a Feira do cómic coa presenza de 35 editoriais e librarías especializadas, con máis de 100 actividades, entre elas, firmas, charlas, presentacións, visitas guiadas e masterclasses nos Xardíns de Méndez Núñez. Por suposto tampouco faltarán os talleres e revisión de portafolios por parte de editores na sección Viñetas Pro. E, como ocorreu xa o pasado ano, durante todo o festival tamén se poderá gozar da gastronómía coruñesa grazas ás Viñetas Ñan, onde restaurantes da cidade ofrecerán pratos inspirados no mundo do cómic.
Ningún comentario:
Publicar un comentario