O albergue municipal de A Guarda pechará durante as semanas de Nadal
• Nese período o Concello aproveita para realizar tarefas de mantemento das instalacións
No día de hoxe, o Concello de A Guarda vén de facer público que “ante a redución do número de peregrinos nestas datas de Nadal, o Albergue Municipal de Peregrinos permanecerá pechado do luns 16 de decembro ata o xoves 16 de xaneiro, abrindo novamente a partir do venres 17 de xaneiro.
Os meses de menor afluencia de peregrinos son decembro e xaneiro debido aos días curtos, o empeoramento do tempo e as celebración do Nadal. Nestas semanas de peche do albergue aprovéitase para realizar tarefas de mantemento das instalacións.
Durante este 2024 aloxáronse 4.250 peregrinos, uns 150 peregrinos máis con respecto a 2023. O albergue ten unha capacidade para 36 persoas polo que moitos peregrinos escollen outros tipos de aloxamentos turísticos como os hoteis, especialmente nos meses de inverno”.
O Camiño Portugués da Costa segue a crecer, sendo notable a presenza constantes dos peregrinos que percorren as nosas rúas e tamén como reflexan os datos rexistrados na Oficina do Peregrino en Santiago con 74.500 peregrinos a día de hoxe, superando os 52.000 rexistrados en todo o 2023.
Ningún comentario:
Publicar un comentario