Xa está na rúa O Balueiro
• Un periódico quincenal para pór en valor toda a riqueza de A Guarda e súa contorna
Infogauda/ A Guarda
A aparición dun periódico quincenal nunha vila pequena como A Guarda, na que houbo varias cabeceiras - La Voz del Tecla, Heraldo Guardés, Nuevo Heraldo, Presente, Nosa Lucha, A Voz do Miño,...- pode entenderse como unha expresión de dinamización cultural e de recuperación do espazo informativo e mesmo da memoria local. Dese xeito, a edición, publicación, distribución e venda dun novo periódico quincenal evidencia a persistencia dunha demanda social de información e identidade comunitaria, mesmo despois da desaparición das cabeceiras anteriormente mencionadas.
Por iso, despois de varias décadas sen un periódico impreso, editado na nosa vila, é moi alentador informar que no día de onte, venres, 15 de maio ás 20.00 horas, no Centro Cultural de A Guarda, levouse a bo termo a presentación dun periódico quincenal en papel, O Balueiro, que nace coa intención de pór en valor toda a riqueza deste recuncho galego, A Guarda.
Os artífices do proxecto, Alberto Carreira (Berto Pirata) e María Salinas García, foron presentados polo alcalde da vila, Roberto José Álvarez Carrero, que debullou os principais aspectos biográficos de ambos os dous.
A continuación, María Salinas anunciou tamén a presentación dunha asociación cultural co mesmo nome (O Balueiro) e as futuras propostas que queren levar a cabo na vila, e defendeu que, “nun mundo cada vez máis tecnolóxico, ler e escribir é un acto de rebeldía”.
Marisol Diz Amil, a encargada da Biblioteca Pública Municipal de A Guarda, leu un texto co que deu paso a Alberto Carreira, quen comezou falando de A Guarda como unha vila que cura a alma e despois se centrou nas diversas seccións que compoñen o periódico. Alberto informou tamén que ademáis do xornal, creouse unha páxina de Facebook con contidos novos.
Mentres se desenvolvía a charla, os autores da mesma pasaron un xornal entre os asistentes para que o asinaran ou deixaran algún comentario.
O momento álxido da presentación chegou co visionado dunhas imaxes enviadas por un dos guardeses máis internacionais: Jorge Rodríguez Alonso (Jorge Laguardia), residente en Menorca (Illas Baleares) e director de Cultchachacha, que entrou a través dun vídeo cos mellores desexos cara a este proxecto e coa intención de darlle unha sorpresa a súa nai, sentada na primeira fila.
Os, arredor de cen asistentes, presentes no evento saíron da sala con cadanseu exemplar do nº 0 do periódico, de balde, pequeno agasallo co que a organización quixo agradecer a asistencia.
Desde hoxe, O Balueiro véndese nas librerías e quioscos de A Guarda, pero tamén en eventos deportivos do Mecalia Atlético Guardés e do Sporting Guardés, como forma de apoiar o deporte local, e na carnicería Villa da praza de abastos.
Berto e María móstranse contentos pola boa acollida da veciñanza e xa contan cos primeiros suscriptores e anunciantes. Declaran que están abertos a propostas e suxestións, pois O Balueiro “está feito con anaquiños de todos vós”.
Desde este xornal dixital transfronteirizo desexámoslle boa proa a O Balueiro e a seus editores, colaboradores, anunciantes e lectores.
Ningún comentario:
Publicar un comentario