A GUARDA

O alumnado-traballador do obradoiro de emprego Manuel B. Portela IX, rehabilita a antiga escola de san Lourenzo

    

Dous dos alumnos-traballadores do obradoiro de emprego Manuel B. Portela IX, traballando no interior da antiga escola da avenida de san Lourenzo

Foto: C.A.G.

Infogauda / A Guarda 

 O obradoiro de emprego Manuel B. Portela IX,  que ofrece durante 12 meses, formación e emprego de forma simultánea para 20 persoas desempregadas, encara o seu último trimestre de traballo en albanelería.  

 Esta edición comezou a finais do ano pasado con dous proxectos como obxectivo. O primeiro deles execútase no mesmo lugar onde se lles imparten as clases teóricas, no edificio da Avenida Diego Antonio González. Alí, o alumnado ten dúas tarefas principais: a rehabilitación das fachadas e a construción dunha nova saída do edificio, o que implicaba  a localización dunhas novas escaleiras.  

 O segundo proxecto consiste na rehabilitación da antiga escola de san Lourenzo, en Cividáns, tanto no exterior como no interior. Un dos principais obxectivos é manter a súa esencia, como o seu característico teito, mais convertendo o edificio nunha construción eficiente enerxeticamente.   

 Ao finalizar o prazo dos 12 meses, o alumnado recibirá o seu certificado que facilitará a súa busca de emprego e que lles acredita a formación e experiencia durante todo o período.