PONTEVEDRA

Día Internacional das Mulleres, na Subdelegación do Goberno en Pontevedra   

Abel Losada anima á sociedade a “plantar cara contra calquera intento de regresión nos avances do feminismo”  

• O  subdelegado do Goberno presidiu hoxe o acto institucional de lectura do manifesto polo 8 de marzo, que correu a cargo de nove alumnas do IES Sánchez Cantón de Pontevedra 

• Losada reivindicou o traballo “progresista e feminista” do Goberno presi-dido por Pedro Sánchez e salientou a relación directa “entre as políticas sociais e os avances en igualdade”

O subdelegado do Goberno en Pontevedra, Abel Losada, presidiu esta mañá o acto institucional do Día Internacional das Mulleres (8M) na Subdelegación do Goberno 

Foto: S. de G.

Infogauda / Pontevedra

 O subdelegado do Goberno en Pontevedra, Abel Losada, presidiu esta mañá o acto institucional do Día Internacional das Mulleres (8M) na Subdelegación do Goberno. O subdelegado, en presencia de representantes institucionais, das Forzas e Corpos de Seguridade do Estado e dos organismos do Estado na provincia, foi o encargado de inaugurar o acto, no que se procedeu a lectura do manifesto do 8M por parte de nove alumnas do IES Sánchez Cantón de Pontevedra.  

 Losada reivindicou o traballo do Goberno “feminista e progresista” que preside Pedro Sánchez e sumouse a campaña do Ministerio de Igualdade, “Con M de Mulleres. Todas as Mulleres. Móvete”, lembrando “o camiño xa andado” e convidando a seguir avanzando. Na súa intervención destacou que as políticas feministas non son simples “abstraccións”, senón que se traducen en cuestións tan concretas como a suba do Salario Mínimo Interprofesional (SMI), que está a reducir a fenda salarial, como a Reforma Laboral, que consolidou o traballo das mulleres máis novas, ou a mellora nas pensións mínimas, que beneficiou, dun xeito moi especial, ás mulleres viúvas. “Existe unha relación innegable entre as políticas sociais e o avance da igualdade e do feminismo”, incidiu.  

 Así mesmo, Losada animou a todas e todos a “plantar cara a calquera intento de regresión nos avances do feminismo e nas conquistas dos últimos anos”. Neste sentido, advertiu da importancia de seguir consolidando estes logros e “nunca dalos por feitos”. Apelou, por tanto, á colaboración interinstitucional “nunha causa que debe ser común e incuestionable”. O subdelegado dirixiuse, ademais, ás Forzas e Corpos de Seguridade do Estado para agradecer o seu labor na loita, en primeira liña, contra a violencia de xénero. Finalmente, considerou o 8M como unha “data estratéxica” para este Goberno progresista. 

 O alumnado do IES Sánchez Cantón, coa coordinadora de Igualdade, Conchi Díaz, á cabeza foi protagonista do elemento central da celebración institucional coa lectura do Manifesto polo 8M. Así tomaron a palabra Tala, Cristina, Greta, Carlota, Ánxela, Manuela, Marta e Paula, alumnas de 2º da ESO, que foron as encargadas da lectura do manifesto en galego e castelán.  

 As alumnas reivindicaron a importancia da Educación como ferramenta clave para avanzar en igualdade “e debilitar as masculinidades hexemónicas” e corroboraron o compromiso do instituto Sánchez Cantón e da Subdelegación do Goberno para seguir avanzando “na axenda dunha España, dunha Galicia e dunha Pontevedra feministas; dunha España, dunha Galicia e dunha Pontevedra mellores”. 

 O acto celebrado hoxe no salón de actos da Subdelegación culminou toda unha semana de actividades que se están a despregar por toda a provincia para poñer en valor a loita feminista e que continuarán tamén nas próximas.