O clásico conto de Xan e as fabas máxicas, a vindeira cita dentro do Outono Teatral
• Sábado 12 de novembro, ás 18:00h no salón de actos do Centro Cultural.
Infogauda / A Guarda
Cunha coidada presentación e estética a compañía Caramuxo representa con teatro de monicreques e actor a proposta As fabas máxicas. Cunha linguaxe actualizada e enlazada coa nosa realidade, a historia respecta non obstante o argumento orixinal do clásico conto infantil. Tras criarse na aldea coa súa avoa, Xan vive agora nun pequeno apartamento nun dos edificios mais altos de Nova York. Un día coidando das plantas da súa terraza, descobre algo que lle fai lembrar unha infancia chea de aventuras con xigantes, galiñas con ovos de ouro, plantas trepadoras ao infinito,.... mais con valor, emoción e inxeño conseguirán vencer todos os obstáculos.
A cita será este sábado ás 18:00h. no salón de actos do Centro Cultural de A Guarda. Non é precisa a inscrición previa e a entrada é de balde. A duración prevista é de 45min. Sendo unha proposta válida para nenos a partir dos 3-4 anos.
Este espectáculo é a segunda entrega para público infantil do ciclo Outono Teatral subvencionado pola Deputación de Pontevedra a través do Plan Concellos 2022.
Pódese atopar un adianto da proposta premendo nesta ligazón.
Ningún comentario:
Publicar un comentario