BAIONA

O CONSELLO DA XUNTA DE GALICIA DÁ O VISTO E PRACE AO CONVENIO CO CONCELLO DE BAIONA PARA A EXECUCIÓN DO PLAN DE SUSTENTABILIDADE TURÍSTICA DESCUBRE BAIONA QUE CONTA CUN ORZAMENTO DE 2 MILLÓNS DE EUROS 

· Engloba diversas actuación como a reforma e renaturalización da contorna de Santa Liberata e a adecuación e mellora do carril bici existente

· O plan Descubre Baiona recolle tamén a creación dun aparcamento disuasorio, e o deseño e sinalización de roteiros de sendeirismo, BTT e carreiras de sendeirismo

· Está financiado no marco do Plan de recuperación, transformación e resiliencia dos Fondos NextGeneration 

Vista de Baiona desde á fortaleza de Monterreal

Foto: Alma

Infogauda / Baiona

 O Consello da Xunta autorizou hoxe a subscrición do Convenio de colaboración entre a Axencia de Turismo de Galicia e o Concello de Baiona para a execución do Plan de sustentabilidade turística en destino Descubre Baiona no marco do Plan de recuperación, transformación e resiliencia, financiado pola Unión Europea-NextGenerationEU, por un importe total de 2 millóns de euros. 

 O obxectivo é implementar actuacións de impulso da sustentabilidade na súa tripla vertente: ambiental, socioeconómica e territorial, a fin de beneficiar tanto aos ditos destinos turísticos, como aos axentes sociais e aos operadores privados do sector. 

 O Concello de Baiona levará a cabo a reforma e renaturalización da contorna de Santa Liberata, a adecuación e mellora do carril bici existente. Levará a cabo un control de cabida e a creación dun cadro de mando para a avaliación da mobilidade, así como a elaboración dunha web e dunha app baixo o nome Descubre Baiona. 

 No eido da mellora enerxética implantarase un sistema de alugueiro de bicicletas, levará a cabo a realización dun estudo para a mellora da conectividade urbano-rural sustentable, así como a adecuación de sendas e camiños para a mobilidade sustentable e segura. 

 O plan Descubre Baiona recolle tamén a creación dun aparcamento disuasorio, o deseño e sinalización de roteiros de sendeirismo, BTT e carreiras de sendeirismo, así como a realización dun proceso participativo para a creación de inventario de recursos naturais e patrimoniais do rural do concello.