12 de maio de 2022

CULTURA

A DEPUTACIÓN DE PONTEVEDRA VAI LEVAR A OIA, O ROSAL, TOMIÑO E TUI, O ESPECTÁCULO ‘DE VALDEORRAS A MÉXICO. TERRA A NOSA’ SOBRE FLORENCIO DELGADO, AO ABEIRO DAS LETRAS GALEGAS  

O propio 17 de maio a representación estará en Oia, no Centro Sociocultural de Pedornes, ás seis da tarde    

Repartiranse 1.000 exemplares da biografía de Gurriarán entre as bibliotecas e os centros de Primaria   




Infogauda / O Baixo Miño

 As actividades das Letras Galegas organizadas dende os servizos de Lingua e Memoria da Deputación de Pontevedra chegarán a 35 concellos de todas as comarcas da provincia para dar a coñecer a vida e obra de Florencio Delgado Gurriarán grazas ao espectáculo ‘De Valdeorras a México. Terra A Nosa’. No Baixo Miño a representación realizarase en Oia o mesmo día das Letras Galegas, o 17 de maio, ás 18 h no Centro Sociocultural de Pedornes; en O Rosal estará o 26; en Tomiño o 29 do mesmo mes ás 17.30h no Auditorio de Goián; e en Tui o 7 de xuño.  

 Trátase dun espectáculo familiar para divulgar a biografía do poeta valdeorrés Florencio Delgado Gurriarán (1903-1987), homenaxeado pola Real Academia  Galega (RAG) co  Día das Letras  Galegas 2022. A deputada de Lingua e Memoria María Ortega considera que o autor é unha das voces máis senlleiras da literatura do exilio polo que nas actividades de realce da súa figura organizadas dende o organismo provincial era precisa unha programación que tivera como protagonismo á cativada. “Por iso ideamos da man da afamada empresa de contacontos ‘Polo correo do vento’, unha actividade que, de xeito ameno e participativo, lles achegue a figura do homenaxeado como exemplo de amor á Terra e mantemento da loita polos ideas, mesmo nas peores das circunstancias”, subliñou a nacionalista.   

 Na actividade alternarase a narración da biografía de Delgado Gurriarán, coa creación dunha ilustración  e a interpretación de distintas pezas musicais. Contará ademais con tradución en lingua de signos, para que sexa accesible a todas as crianzas, e rematará cun pequeno coloquio adaptado ás súas idades e un obradoiro no que cada participante realice a súa propia caricatura  do autor.  

 Foron adxudicatarios das obras os 35 primeiros concellos que presentaron instancia de solicitude, esgotándose os espectáculos dispoñibles apenas en tres horas. Para a deputada María Ortega o interese amosado polos concellos é mostra de que cada vez máis hai consciencia da necesidade de que as administracións locais traballen a prol da lingua e da memoria, achegando a cativada formatos atractivos para tratar os temas segundo a idade.  

 Ademais das obras sobre Florencio Delgado Gurriarán, a Deputación tamén achegará ás bibliotecas municipais e aos centros de ensino pequenas biografías destinadas á cativada. Para o alumnado de Primaria o servizo Editorial da Deputación editou a peza ‘Levar paisaxes nos ollos’ e para a xente moza editou unha banda deseñada coordinada por Kiko da Silva, con guión de Fernando Llor e ilustracións do alumnado de ‘O Garaxe Hermético’. Cadansúa das publicacións tivo unha tiraxe de 1.000 exemplares.  

Máis representacións 

 Os espectáculos de Polo Correo do Vento comezarán este venres 13 en Poio e estenderanse no tempo ata o 27 de xullo. 

 Na área de Redondela estarán o 3 de xuño no concello homónimo e en Pazos de Borbén o 8 de xuño; na zona de Louriña, o 22 de maio en Mos e o 28 de maio en O Porriño, ás 18 horas na rúa San Bieito, coincidindo coa Feira do Libro. 

 Na zona do Val Miñor, en Baiona o 10 de xuño e Gondomar o 3 de xullo; na comarca do Condado-Paradanta será en A Cañiza o 29 de maio;, en Ponteareas o 2 de xuño; Mondariz o 4 de xuño e Salvaterra de Miño o 13 de xuño.  

 No Salnés estarán o 7 de xullo en Sanxenxo, o 19 de xullo en O Grove, e o 27 do mesmo mes en A Illa de Arousa, quedando por axendar data aínda en Meis e Ribadumia. 

 No Morrazo o espectáculo irá a Cangas o 20 de maio. 

 No Deza-Tabeirós, o 23 de maio en Dozón ás 16 horas no CEIP Pio Cabanillas Gallas; o 29 de xuño en Rodeiro; o 6 de xullo en Vila de Cruces; e o 22 do mesmo mes en Agolada. 

 Na comarca de Caldas estarán o 1 de xullo en Cuntis; o 2 en Pontecesures; o 7 en Caldas; o 12 en Portas; o 14 en Catoira, e o 21 en Moraña.   

 Na área de Pontevedra as representacións realizaranse este venres 13 no Concello de Poio, ás 17 horas no Centro Cultural Xaime Illa de Raxó; o 24 ás 11h no CEIP de A Lama; o 25 de maio en Ponte Caldelas (19h na Casa da Cultura), o 26 en Cerdedo-Cotobade;  e o 5 de xuño en Campo Lameiro.

Ningún comentario:

Publicar un comentario