A Xunta de Galicia habilita unha embarcación para atravesar o río Miño entre A Guarda e Caminha que dará servizo a veciños, turistas e peregrinos do Camiño da Costa
O vicepresidente primeiro, Alfonso Rueda, salientou que este novo servizo, Xacobeo Transfer, potencia o Camiño Portugués pola Costa xa que permite aos peregrinos atravesar directamente desde Caminha a A Guarda e viceversa
Turistas e peregrinos contarán xa nesta Semana Santa cun servizo de transporte de dúas embarcacións, unha delas eléctrica, e a partir de xullo vaise habilitar un barco exclusivo para este servizo de propulsión eléctrica con capacidade para 12 viaxeiros que conectará os dous peiraos
O novo servizo xogará a favor da afluencia turística nunha Semana Santa na que as expectativas ofrecen cifras similares ás da prepandemia
Alfonso Rueda indicou que o Camiño é “un nexo de unión entre Galicia e o norte de Portugal que crea riqueza e emprego ás dúas marxes do río Miño”
O vicepresidente primeiro da Xunta de Galicia, Alfonso Rueda, na praza da IIª República, preto do embarcadoiro de A Pasaxe (Camposancos), nun momento da súa intervención, en presenza do delegado territorial da Xunta en Pontevedra; do alcalde de A Guarda e da alcaldesa de Oia, e doutras representaciónsFotos: X.G.
O alcalde e a tenente de alcalde de A Guarda, co delegadao territorial da Xunta de Galicia e acompañantes, a bordo da embarcación que hoxe entrou en servizo
Infogauda / A Pasaxe (Camposancos)
O vicepresidente primeiro da Xunta de Galicia, Alfonso Rueda Valenzuela, acompañado do delegado territorial da Xunta en Pontevedra, Luís López Diéguez; do alcalde de A Guarda, Antonio Lomba Baz; a da tenente de alcalde de A Guarda, Mª Montserrat Magallanes Álvarez; e do concelleiro de Turismo, Rafael Álvarez Martínez, e outros membros da corporación municipal guardesa, coñeceu hoxe o proxecto Xacobeo Transfer, un novo servizo de turismo náutico sostible habilitado no Baixo Miño para conectar a localidade galega de A Guarda coa localidade portuguesa de Caminha e do que poderán beneficiarse tanto os veciños como os turistas e peregrinos do Camiño Portugués da Costa.
Desde hoxe, os peregrinos que queiran cruzar desde Caminha a A Guarda, e viceversa, dispoñen de dúas embarcacións, unha delas eléctrica, que une os dous peiraos. O novo servizo facilita e promove o Camiño de Santiago seguindo o itinerario que parte do Porto e pasa por Labruge, Póvoa de Varzim, Esposende, Marinhas, Viana do Castelo e Caminha e que entra en Galicia pola Pasaxe (Camposancos) A Guarda, pasando despois por O Rosal, Oia, Baiona, Nigrán e Vigo ata unirse co Camiño Portugués, en Redondela.
O vicepresidente primeiro subliñou que supón tamén un atractivo para o turismo en xeral e un novo servizo para os veciños a un e outro lado do Miño. “O Camiño é un nexo de unión entre Galicia e o norte de Portugal que crea riqueza e emprego”, dixo Rueda en relación aos proxectos conxuntos que Galicia e o norte de Portugal levan artellando dende hai décadas en beneficio da súa veciñanza.
O novo servizo reforzarase a partir do mes de xullo coa habilitación dun barco propio e exclusivo de propulsión eléctrica con viaxes regulares nos dous sentidos. Esta actividade levarase a cabo a través do convenio asinado entre Turismo de Galicia e a Asociación Galega de Actividades Náuticas (Agan+) que se fará cargo do transporte.
O proxecto de turismo náutico complétase con melloras no peirao da Guarda e coa sinalización da ruta xacobea e dos servizos complementarios habilitados na zona no marco dun plan de potenciación do Baixo Miño que inclúe tamén rutas de sendeirismo e itinerarios pola zona con medios de transporte sustentables.
O CAMIÑO PORTUGUÉS POLA COSTA: UNHA RUTA XACOBEA CHEA DE ATRACTIVOS
Alfonso Rueda manifestou a súa satisfacción pola posta en marcha dun proxecto que era prioritario para o Goberno galego que, no marco do Xacobeo, traballa na potenciación do Camiño e que quere poñer en valor a variante do Camiño Portugués pola Costa, unha ruta chea de atractivos que nos últimos tempos non deixa de medrar e que no que vai de ano supera xa os 700 peregrinos que recolleron a súa Compostela.
O vicepresidente primeiro destacou o feito de que este novo servizo bote a andar coincidindo coa entrada nunha Semana Santa cunhas previsións moi favorables para a ocupación turística en Galicia. Estas expectativas vanse ver reforzadas co proxecto de turismo náutico que favorecerá, sobre todo, a promoción do Baixo Miño. “As previsións son moi boas e poderían acadarse cifras semellantes ás da prepandemia ou incluso mellores, case históricas”, asegurou Alfonso Rueda.
Esa é a alternativa ao transbordador, de veras??
ResponderEliminarA desvergonza dos nosos responsables políticos vai parella a súa imcompetencia e cara dura.
Precisamos comunicación constante e de calidade e non un barquiño de xoguete.
Caminha e a Guarda estaba millor comunicada no século que a día de hoxe.