LABORAL

O PERSOAL DA FÁBRICA DE IKF NAS CACHADAS, DESENVOLVERÁ UNHA CONCENTRACIÓN EN VIGO

Este mércores día 6 de outubro, ás 11:00 horas, diante da delegación da Xunta (rúa Concepción Arenal, 8)

Imaxe dunha recente mobilización do persoal de IKF da fábrica das Cachadas

Foto: CIG

Infogauda / A Guarda

 O cadro de persoal de  Imerys Kiln Furniture (IKF), empresa con sede e factoría nas Cachadas (A Guarda) dedicada á fabricación de materiais refractarios, desenvolverá este mércores día 6 de outubro ás 11:00 horas, diante da delegación da Xunta (rúa Concepción Arenal, 8), en Vigo, unha concentración "para reclamar a implicación do Goberno  galego no conflito laboral que manteñen coa dirección da transnacional francesa, que pretende  precarizar as condicións laborais e vulnerar o dereito de conciliación."  

 Os traballadores/as, que levan máis de 30 días de folga contra a intención da empresa de prolongar  a dobre escala salarial e de ampliar a xornada de luns a domingo, solicitaron unha reunión coa  delegada da Xunta e aínda están á espera de contestación. 

 Lembran que IKF, que emprega a preto dun cento de persoas, é unha das principais compañías da  comarca do Baixo Miño.

 O pasado venres día 1 de outubro, unha representación do persoal de IKF da fábrica das Cachadas, asistiu a sesión plenaria ordinaria da Corporación Municipal do Concello de A Guarda. Na devandita sesión foi aprobada por unanimidade de todos os grupos municipais (PP, PSOE, BNG e CG), a urxencia da moción presentada así como tamén a parte resolutiva da devandita moción, deixando constancia do apoio de toda a Corporación Municipal as lexítimas reivindicacións dos traballadores e traballadoras de IKF, e instando a chegar a un acordo entre o persoal e a empresa.