A GUARDA

10 outubro: Día Mundial da Saúde Mental 

Avelaíña conmemora o  Día Mundial da Saúde Mental baixo o lema “SAÚDE MENTAL, UN DEREITO NECESARIO” 

A pandemia provocada polo COVID sacou a luz,  con maior forza que nunca, a fraxilidade da saúde mental e a necesidade de prestarlle atención de urxencia. Por iso, con motivo do Día Mundial da saúde mental, que se celebra o 10 de outubro, baixo o lema  “saúde mental, un dereito necesario” Avelaíña está a organizar unha serie de actividades nos concellos do Baixo Miño  

 “Saúde mental, un dereito necesario”  

Fotos: Avelaíña

Natalia Guisande / A Guarda

 O 10 de outubro celébrase o Día Mundial da Saúde Mental, conmemoración que pretende sensibilizar e informar sobre a importancia do coidado da saúde mental e a defensa dos dereitos das persoas que teñen algún problema desta índole. Este ano, o tema elixido a nivel mundial para esta conmemoración é a saúde mental nun mundo desigual, chamando a atención sobre aqueles factores que impiden que o coidado da saúde mental poida chegar a todas as persoas en igualdade de condicións.  

 A este propósito, baixo o lema “saúde mental, un dereito necesario”, aliñado coa temática mundial desta conmemoración, a entidade pretende  denunciar as desigualdades que existen ao redor da saúde mental e que poden ocorrer por diversos motivos (económicos, por idade, por xénero, por educación ou por lugar xeográfico), así como reivindicar a importancia de que a atención á saúde mental sexa igual para todas as persoas. Ademais, o lema pretende concienciar sobre o feito de que a saúde mental afecta a todo o mundo e que, por iso, todos e todas debemos coidala.     

Marea verde no Baixo Miño

 Unha destas actividades, será o alumeado en cor verde, a petición de Avelaíña,  dos edificios  dos Concello de A Guarda,  O Rosal, Tomiño e Tui,  en sinal de apoio a saúde mental  e co obxetivo de dar visibilidade á situación  deste colectivo. 

Unha colaboradora da asociación Avelaíña na mesa informativa instalada na Praza do Seixo (Tomiño)

Mesas informativas en Tomiño 

 Avelaíña instalou esta semana na Praza do Seixo en Tomiño unha mesa informativa co obxetivo de sensibilizar e informar sobre a importancia do coidado da saúde mental, sobre o traballo que realiza a asociación e os recursos da contorna. 

Asociación Avelaíña 

 A Asociación Avelaíña é unha entidade sen ánimo de lucro que nace no ano 1997 na comarca do Baixo Miño, coa misión de potenciar a inclusión das persoas con problemas de saúde mental mediante a promoción da súa calidade de vida e a dos seus familiares. Foi declarada Entidade de Utilidade Pública no ano 2010.  

 Tras 24 anos de andaina, na actualidade a asociación está integrada por 17 profesionais e máis de 400 persoas socias con enfermidade mental, familiares, coidadores e persoas sensibilizadas ante este problema de saúde. Sendo o seu ámbito de actuación a provincia de Pontevedra, hoxe en día Avelaíña está presente no Baixo Miño,  no Val  Miñor,  no  Condado,  na  Paradanta  e en Salceda  de  Caselas e conta con numerosos convenios e concertos con organismos públicos, promovendo  aquelas  intervencións  na  área  da saúde mental non cubertas polas institucións existentes e  procurando unha mellor relación entre a persoa e o seu medio.