SALCIDOS (A GUARDA)

A COMUNIDADE DE MONTES DE SALCIDOS ESTÁ ORGANIZANDO UN EVENTO CULTURAL E GASTRONÓMICO

•  Celebrarase os días 4 e 5 de outubro, no Parque do Monte Torroso 

Casa da Comunidade de Montss Veciñais en Man Común de Salcidos

Foto: Infogauda

Ricardo Rodríguez Vicente / Salcidos

 Desde fai varias semanas, a xunta reitora da Comunidade de Montes Veciñais en Man Común de Salcidos, que preside Antonio Álvarez González, está realizando as oportunas xestións diante das administracións correspondentes, para organizar os días 4 e 5 de mes de outubro deste ano, un evento cultural e gastronómico, no Parque do monte Torroso.

 Dese xeito, segundo vén de facer público Manuel Benito Lomba Portela, secretario da devandita xunta reitora, o sábado día 4 de outubro, a partir das 10:00 da mañá, haberá un concurso de escultura en pedra, con premios en metálico.

 Durante todo o día haberá postos de comida (chouripan, empanadas,...) e bebida, a prezos populares, así como animación musical a cargo de varios grupos que a organización irá dando a coñecer oportunamente.

 O domingo, día 5 de outubro, tamén a partir das 10:00 da mañá, demostración de talla en madeira con motoserra, a cargo dos dous mellores profesionais na materia, a nivel nacional, tanto masculino como feminino.

 No que respecta ao ámbito culinario, durante todo o día, o prato estrela será porco ibérico ao espeto. Tamén haberá outras propostas culinarias para escoller.

 As 12:00 da mañá, será inaugurado o "Monumento ao Monte Torroso", obra do mestre canteiro Anxo Ferreira Álvarez, natural de As Laxes (Buxán). Nese acto tamén participará o dramaturgo, escritor e poeta Francisco Álvarez Álvarez (Koki), natural da Estivada (Buxán). 

 Asemade, ao longo de todo o día haberá animación musical con varios grupos.

 Tamén haberá andainas, inchables para nenos/as, e outros actos culturais para todos os públicos.

 O recinto do evento estará cubero cunha carpa.