A GUARDA

SALCIDOS ACOLLEU A PRIMEIRA ACTUACIÓN DA AGRUPACIÓN MUSICAL DE A GUARDA, NO CICLO CONCERTOS NAS PARROQUIAS

A banda de música da Agrupación Musical de A Guarda actou na praza de Salcidos

Fotos: A.M.de A. G.

Ricardo Rodríguez Vicente / Salcidos (A Guarda)

 A banda de música da Agrupación Musical de A Guarda comezou na tardiña de onte, venres 29 de agosto, na praza de Salcidos - anuencia incluída, dunha climatoloxía favorable -, a segunda edición do ciclo Concertos nas parroquias, organizado pola devandita agrupación, coa colaboración do Concello de A Guarda.

 Diante dunha representación da veciñanza - entre a cal estaba o alcalde Roberto José Álvarez Carrero - de Salcidos así como doutros lugares da localidade; a banda de música da Agrupación Musical de A Guarda, dirixida por Víctor Luis Alonso Treinta, ofreceu ao respectable un concerto de algo máis de 60 minutos de duración. 

 A actuación da banda de música de A Guarda, comezou coa interpretación da obra A Piña centenaria, de Vitor Resende, que foi acollida cos aplausos dos asistentes. 

 A continuación a Agrupación Musical de A Guarda fixo un percorrido musical polas BSO (bandas sonoras orixinais), de filmes do Oeste americano, dos anos 70 do século XX.

 Despois interpretaría Piratas del Caribe, de Klaus Badelt.

 Seguidamente, a banda ofreceu unha obra de inspiración española, para continuar cunha selección de fragmentos - A Man After Midnight -) de música pop (The Winner Takes It All; Dancing Queen, Gimme! Gimme! Gimme!; Fernando,...) do grupo sueco Abba, que foron grandes éxitos.

 En verbas de Víctor Luis Alonso Treinta, houbo unha lembranza de aprecio e admiración deica á figura do compositor, director e músico José Luis Lorenzo Rodríguez, unha persoa que achegou un formidable legado á cultura musical de noso. Por iso, na súa honra a Agrupación Musical de A Guarda interpretou Pasodoble guardés, a cuxo termo, o público premiou cunha grande ovación á banda.

 Despois viría outra obra de inspiración galega, e a continuación Flashdance • What a Feeling, de Irene Cara.

 Xa no último tramo do concerto, houbo un momento para interpretar Martiñika (pasodoble), de  Rogelio Groba Groba e Indalecio Fernández Groba, así como a Muiñeira A Pepa, de José Oro Val, coa que remataria o concerto. 

 Máis, atendendo os desexos de gran parte do público, a Agrupación Musical de A Guarda interpretou Mambo nº 8, de Dámaso Pérez Prado, a cuxo termo o público posto en pé, premiou con espontáneos aplausos á actuación da banda de música que deixou, unha vez máis, unha grata imaxe conxunta desa formación, que vén de celebrar seu XX aniversario.

 A vindeira actuación do ciclo Concertos nas parroquias será o día 5 de setembro, ás 20:00 horas, na praza de Buxán. E o día 13 dese mes, ás 19:00 horas, na praza de San Amaro, en Camposancos.