PONTEVEDRA

Unanimidade dos grupos da corporación provincial na constitución da Comisión Técnica que asesorará aos concellos no Plan de Acción Local fronte ao COVID-19  

Os tres portavoces asinaron hoxe a constitución do novo órgano que prestará asesoramento aos municipios ante todas as circunstancias derivadas da crise sanitaria 

Carmela Silva presidiu no día de hoxe unha nova sesión do Comité de Seguimento do COVID-19

Foto: D.PO.

Infogauda / Pontevedra

  A presidenta da Deputación, Carmela Silva, destacou hoxe o consenso acadado entre todos os grupos con representación na corporación provincial para a posta en marcha da Comisión Técnica para a Asistencia Municipal, cuxa acta de constitución asinaron hoxe por unanimidade os portavoces do PSdeG-PSOE, Carlos López Font; do BNG, César Mosquera, e do PP, Jorge Cubela, durante a sesión do Comité de Seguimento do COVID-19. Como subliñou Silva, este órgano, no que participan sete funcionarias e sete funcionarios de alto rango da institución, "non é unha comisión exclusivamente do Goberno da Deputación, senón un acordo de toda a corporación provincial".

  Esta comisión, como lembrou a presidenta, ten como obxectivo a elaboración dun Plan de Acción Local de Loita contra o COVID-19 e con tal fin redactará un documento que "se converterá nun gran pacto local" e que recollerá todas as medidas e estratexias que se realizarán en cada un dos ámbitos de competencia municipal que se poidan ver afectados pola crise sanitaria. Deste xeito, a nova comisión prestará asesoramento aos concellos da provincia en cuestións como posibles modificacións orzamentarias, solicitude ou modificacións de subvencións, clarificación de competencias municipais e tamén, como apuntou a presidenta, "en como se actuará nun momento como este en ámbitos como os cemiterios, a limpeza viaria, limpeza de edificios públicos, nas feiras, mercados de abastos, lonxas, comercio ambulante, en cuestións como o tratamento da materia impositiva, con parques públicos, con xardíns, coa mobilidade, e con praias entre outras".

  A presidenta indicou que os/as integrantes da comisión xa están a preparar toda a documentación para "facer propostas concretas sobre cada unha desas cuestións nas que van a asesorar aos concellos da provincia de Pontevedra".

Cancelación de programas

  Doutra banda, o Comité de Seguimento do COVID-19 tamén acordou por unanimidade de todos os grupos políticos, baixo o criterio da prudencia e atendendo aos informes técnicos e sanitarios que se teñen realizado sobre cada un dos programas que desenvolve a Deputación, a cancelación de varias das iniciativas previstas para este ano ante a inviabilidade de poder desenvolvelas nas actuais circunstancias. "É unha decisión rigorosa, baseada en análises técnicos e sanitarios, que non supón que non vaiamos facer outras cousas", afirmou Silva.

  Como explicou a presidenta, "hai un acordo de todos os membros da comisión para facer isto, porque é fundamental ter cautela e que a saúde sexa o centro de todas as decisións", especialmente, como subliñou, cando os estudos de prevalencia amosan que o coronavirus tivo unha baixa circulación en Galicia e na provincia, "debido a que o 13 de marzo se tomou a decisión de declarar o estado de alarma", polo que "temos unha baixísima inmunidade e temos que ser aínda máis cautelosos" ante a posibilidade de novos rebrotes. Afirmou que estes programas das áreas sociais, mocidade, igualdade e deportes se retomarán no 2021 "coas actuais características se as circunstancias son de normalidade e, se non, os modificaremos para responder á nova realidade". En concreto, os cancelados este ano son Tecendo Lazos, Depotermal, Depo en Marcha, En Ruta coa Depo, Depoaventura A Lanzada, Depodesafío, Depoandainas, os Campamentos Polideportivos e Conectadas.

  Carmela Silva sinalou que moitos destes proxectos estaban dirixidos a poboación considerada de risco polas autoridades sanitarias, como as persoas maiores, ou os locais onde se desenvolvían estes programas, na súa maioría ligados a asociacións de todo tipo da provincia, "non poden cumprir coa obriga de manter o distanciamento físico". Amais, outras actividades estaban dirixidas a grupos amplos que incumpren os aforos establecidos coa nova normalidade "e a súa redución racharía total e absolutamente co espírito dos programas". E a todo isto únese a imposibilidade, como sinalou a presidenta, de celebrar todas as citadas actividades por medios telemáticos ou en liña.

  Noutros casos, engadiu a presidenta, os colectivos sociais aos que van dirixidos poderían ter dificultades para garantir cuestións como a limpeza dos locais, a súa desinfección e tamén a dotación de material de protección para as persoas participantes. E outros programas incluían visitas a museos e equipamentos culturais, turísticos ou de hostalería, que van ver reducido o número de visitantes e clientes, "polo que sería imposible cubrir a demanda dos e das participantes". No caso concreto dos campamentos infantís da Lanzada, resultaba inviable a asistencia do mesmo número de nenas e nenos das edicións anteriores e garantir as actividades paralelas, como excursións ou desprazamentos ás praias, e "a separación física nas zonas comúns, tanto de pernoctas como alimentación, sería imposible de garantir nos espazos que se desenvolve".

  Esta suspensión suporá a reorientación de todas as actividades e programas propios da Deputación, que se incluirá nunha modificación dos orzamentos prevista para o mes de xullo. "Isto significa -aclarou Carmela Silva- que non faremos estes programas pero daremos outros vinculados ás areas de igualdade, deporte,  medio ambiente ou lecer e que sen dúbida van ser distintos".