A GUARDA

En aras de facilitar a recuperación do sector da hostalería, un dos máis castigados polo COVID-19

O concello solicita a Portos de Galicia e Costas do Estado a anulación da taxa de terrazas do ano 2020

      Unha das terrazas da rúa do Porto, na vila de A Guarda

Foto: C.A.G.

Infogauda / A Guarda

 Diante da situación de emerxencia sanitaria provocada pola pandemia orixinada polo virus COVID-19 que está a provocar graves prexuízos para a economía, e por conseguinte, para o emprego e o desenvolvemento social; o concello de A Guarda está tomando unha serie de medidas para contribuir á recuperación da actividade productiva, entre elas está a anulación da taxa de terrazas ao sector hostaleiro.

 Nesa liña de actuacións, a Corporación Municipal do Concello de A Guarda aprobou, no pleno extraordinario e urxente celebrado o pasado día 5 de maio, unha modificación da ordenanza fiscal de ocupación por terrazas. A nova redacción conleva a anulación da taxa por instalación de mesas e cadeiras en solo de competencia municipal. Dese xeito, durante este ano 2020 o concello non gravará aos bares e restaurantes coa devandita taxa de terrazas.  

 Ademais o alcalde de A Guarda, Antonio Lomba Baz, adquiriu o compromiso de ampliar a superficie das terrazas de competencia municipal alí onde fora posible, recurrindo incluso a peonalización dalgunhas rúas se houbera demanda por parte dos establecementos. 

 Dado que un bo número de terrazas atópanse en solo de competencia de Portos de Galicia e algunha de Costas do Estado, o alcalde dirixiu sendos escritos ás dúas administracións solicitando que de forma excepcional, durante o ano 2020, adopten as mesmas medidas que xa tomou o concello, en aras de facilitar a recuperación do sector da hostalería, un dos máis castigados pola crise.