19 de feb. de 2020

VILA NOVA DE CERVEIRA / O ROSAL

O Rosal e Vila Nova de Cerveira estreitan lazos  

Primeira reunión oficial da alcaldesa Ánxela Fernández co presidente da câmara cerveirense, João Fernando Brito Nogueira 

A alcaldesa do Rosal, Ánxela Fernández Callís, asinando no Libro de Honra da Câmara Municipal de Vila Nova de Cerveira, en presenza do presidente João Fernando Brito Nogueira

Infogauda / Vila Nova de Cerveira / O Rosal

 A alcaldesa do Concello do Rosal, Ánxela Fernández Callís, visitou onte martes ao presidente da Câmara Municipal de Vila Nova de Cerveira, João Fernando Brito Nogueira, para a presentación institucional destes dous concellos veciños que contan cunha fronteira común. Trátase da primeira reunión institucional entre ambos os dous mandatarios, na que Nogueira e Fernández destacaron o potencial dos dous municipios, territorios que contan con algunhas complementariedades fortalecidas pola súa proximidade xeográfica e polas posibilidades que ofrece a cooperación transfronteiriza. 

 Esta reunión supón o punto de partida para esa colaboración transfronteiriza e para o desenvolvemento de accións de futuro nas que os dous municipios traballen conxuntamente. Ambos mandatarios destacaron a importancia de tecer lazos entre as veciñanzas dos dous concellos e de aproveitar as potencialidades de cada un, como o destacado papel que xoga o tecido asociativo no Rosal. 

 Ánxela Fernández convidou ao presidente da câmara de Vila Nova de Cerveira a visitar o Rosal en próximas datas e así continuar traballando nas relacións transfronteirizas entre ambos concellos.

Ningún comentario:

Publicar un comentario