Amplíase o prazo para visitar a Exposición «Rompe, Xoga en Igualdade»
Esta exposición estará no vestíbulo da Casa dos Alonso ata o vindeiro 23 de abril e poderá visitarse de 8:00 a 15:00 horas
Infogauda / A Guarda
Dende o xoves 7 de marzo, o Concello de A Guarda acolle a exposición «Rompe. Xoga en igualdade», enmarcada dentro das actividades programadas na conmemoración do Día Internacional da Muller 2019.
Esta imaxe corresponde o día da inauguración da exposición «Rompe. Xoga en Igualdade»
Fotos: C.A.G.
Na inauguración da exposición «Rompe. Xoga en Igualdade», unha rompedora mostra da Deputación de Pontevedra coas "Barbies intervidas" coma protagonistas, contouse coas intervencións do alcalde de A Guarda, da tenente de alcalde, da concelleira de Servizos Sociais, así como das súas creadoras, Isabel Blanco e Irene Silva.
Esta exposición estará no vestíbulo da Casa dos Alonso ata o vindeiro 23 de abril e poderá visitarse de 8:00 a 15:00 horas. Está
protagonizada polas famosas bonecas "Barbie", que foron intervidas para
denunciar de forma impactante e rompedora a desigualdade entre homes e
mulleres.
Trátase dunha mostra vangardista e rompedora para golpear as
conciencias e para facer pensar e reflexionar, cuxo obxectivo é non
deixar a ninguén indiferente. Pretende "romper" e reivindicar a
igualdade entre mulleres e homes, así como concienciar á sociedade da
igualdade de oportunidades entre mulleres e homes e do fin da
discriminación e da violencia contra o 52 % da poboación. Para lograr
estes obxectivos hai que "romper" e traballar arreo para evitar a
invisibilidade das mulleres.
As bonecas como arquetipo da "muller obxecto" que amosan situacións de desigualdade, violencia e discriminación. Unha exposición itinerante creada por Isabel Blanco e Irene Silva e con fotografías de Noemí Chantada.
"Rompe. Xoga en igualdade" consta de 18 paneis cheos de poesía visual que teñen por obxectivo cambiar o mundo e golpear as conciencias. Así, as protagonistas dos paneis amosan as situacións de desigualdade, violencia e discriminación que viven as mulleres desde nenas, recalcando a importancia do xogo para a educación, transmisión de valores e formación de nenas e nenos. A boneca seleccionada para a mostra foi a "Barbie" por tratarse da máis famosa da historia e coa que, a diario, xogan milleiros de nenas no mundo, pero que, ao mesmo tempo, presenta a unha muller obxecto que transmite valores sexistas que se están a reproducir tanto nos xogos como nas condutas das nenas e nenos.
Ningún comentario:
Publicar un comentario